Što zdaryłasia ŭ Babrujsku, dzie 17 kastryčnika na vulicy pad kustom byŭ znojdzieny hoły novanarodžany chłopčyk, aficyjna pakul nichto nie kaža. Jak stała viadoma Tut.by, dzicia źjaviłasia na śviet niedanošanym, jaho znajšli supracoŭniki chutkaj, jakija pryjechali na rody. Dźviery ŭ chatu im nichto nie adčyniŭ, adnak niepadalok miedyki znajšli niemaŭla, jakoha terminova zabrali ŭ špital i akazali nieabchodnuju dapamohu.
Dzicia, jak raspaviała zahadčyca adździaleńnia aniestezijałohii i reanimatałohii niedanošanych novanarodžanych Babrujskaha radzilnaha doma Alena Viejs, u stabilna ciažkim stanie. Krynica ŭ miedycynskich kołach paćvierdziła, što maci taksama ŭdałosia znajści, jaje pryvieźli ŭ radzilniu. Jak miarkujecca, baćka dziciaci zatrymany.
Žančyna, jakaja naradziła małoha, žyła ŭ adnym z pryvatnych damoŭ na ŭskrainie Babrujska razam z hramadzianskim mužam i była na vośmym miesiacy ciažarnaści. Što mienavita adbyłosia viečaram 17 kastryčnika pamiž mužam i žonkaj, susiedzi nie viedajuć. Ale toje, što hetuju paru ciažka nazvać ščasnaj, paćviardžajuć.
— Abodva pili. Hieorhiju (imia mužčyny źmieniena) dom dastaŭsia ŭ spadčynu ad baćkoŭ. Prykładna hod tamu źjaviłasia Łarysa (imia žančyny źmieniena), joj na vyhlad hadoŭ tryccać, — raspavioŭ Alaksandr Muraviejka, susied baćkoŭ novanarodžanaha. - Ni jon, ni jana nie pracavali, časta byvali padpiŭšymi. Łarysa «hazavała» navat tady, kali ŭžo była ciažarnaj.
Mužčyna rastłumačyŭ, što ŭ jaho susiedki akramia novanarodžanaha syna jość jašče dvoje dziaciej, adnak jany vychoŭvajucca ŭ dziciačym domie.
— Jana ŭžo była pazbaŭlenaja baćkoŭskich praŭ.
Paśla taho, što adbyłosia, ni Łarysu, ni Hieorhija susiedzi nie bačyli. Dom, u jakim pražyvajuć baćki chłopčyka, zvonku vyhladaje całkam dahledžanym. Praŭda, bramka nie zamykajecca — chtości ź siabroŭ siamji vyłamaŭ zamok. Na bramcy krasujecca płakat u padtrymku ałkaholu — jaho taksama, jak śćviardžajuć susiedzi, paviesili sabutelniki.
— Vyrašyli voś tak «pažartavać», — tłumačyć Alaksandr Muraviejka.
Mužčyna nie vyklučaje, što ŭ viečar rodaŭ pamiž mužam i žonkaj adbyłasia čarhovaja svarka.
— Usie viedali, što Łarysie jašče miesiac da rodaŭ. Ale voś naradziła. A što potym adbyłosia — niezrazumieła, čamu jaho vykinuli, čamu dzicia apynułasia na vulicy?..
Jak paviedamiŭ aficyjny pradstaŭnik USK pa Mahiloŭskaj vobłaści Siarhiej Bołsun, pa fakcie zdareńnia pravodziać pravierku.
Ciapier čytajuć
Rasijanka raskazvała pra hłybinnuju moc Łukašenki — ciapier jana ŭ ślazach źjazdžaje ź Biełarusi22
Kamientary