Fota Voli Aficeravaj
U milicyi Mienskaha rajonu pačali pravierku pa zajavie ŭłaśnikaŭ zabaŭlalnaha kompleksu la Kurapackaha memaryjału, piša Radyjo Svaboda.
Sustaršynia BCHD, abaronca Kurapataŭ Pavał Sieviaryniec paviedamiŭ Svabodzie, što kiraŭnictva restarana «Pajedziem pajadzim» padało ŭ Baraŭlanskaje adździaleńnie milicyi Mienskaha rajonu zajavu ab zaviadzieńni kryminalnaj spravy suprać abaroncaŭ Kurapataŭ.
U zajavie, pavodle źviestak Paŭła Sieviarynca, fihurujuć čaćviora aktyvistaŭ. Heta sam Sieviaryniec, a taksama Źmicier Daškievič, Hanna Šapućka i Dzianis Urbanovič.
«Pra heta siońnia mnie paviedamiŭ učastkovy milicyjant Aleh Čyruk. Jon skazaŭ, što sprava jašče nie zaviedzienaja, ale pavodle zajavy raspačataja pravierka. U jakim my statusie, padazronych ci śviedak, milicyjant nie skazaŭ. Taksama ŭčastkovy nie skazaŭ, pavodle jakoha artykułu moža być zaviedzienaja kryminalnaja sprava. Maŭlaŭ, usio vyrašycca pa vynikach pravierki».
Jak paviedamiŭ Pavał Sieviaryniec, dniami jon ź inšymi aktyvistami źbirajecca padać u milicyju sustrečnuju zajavu na ŭłaśnikaŭ restarana.
«Jość šerah artykułaŭ Kryminalnaha kodeksu, jakija, jak my ličym, byli parušanyja i ciapier parušajucca ŭłaśnikami hetaj ustanovy. Nieŭzabavie my ŭsio heta ahučym», — skazaŭ Pavał Sieviaryniec
