Wikipedia Commons
U Miunchienskaj kanfierencyi pa biaśpiecy, jakaja projdzie ŭ Minsku 31 kastryčnika — 1 listapada, voźmie ŭdzieł piaty prezident častkova pryznanaj Respubliki Kosava Chašym Tačy, piša Tut.by.
U śpisach udzielnikaŭ kanfierencyi, pradastaŭlenych žurnalistam MZS Biełarusi, Tačy paznačany jak «palityčny dziejač Kosava». Na kanfierencyi ŭ Minsku płanujecca abmierkavać biahučyja pierśpiektyvy Minskaha pracesu pa spynieńni kanfliktu na ŭschodzie Ukrainy, budučynia adnosin pamiž Uschodam i Zachadam i zakančeńnie terminu dziejańnia pahadnieńniaŭ ab kantroli nad zvyčajnymi i jadziernymi ŭzbrajeńniami ŭ jeŭraatłantyčnym rehijonie. Akramia taho, buduć abmiarkoŭvacca rehijanalnyja kanflikty i ŭstojlivaść ekanomiki Uschodniaj Jeŭropy.
U svaim tvitary Tačy napisaŭ, što ź nieciarpieńniem čakaje svajho pieršaha vizitu ŭ Biełaruś i padziakavaŭ staršyni Miunchienskaj kanfierencyi pa biaśpiecy Volfhanhu Išynhieru za zaprašeńnie ŭ Minsk.
«Pracesy miru i prymireńnia ŭ Jeŭropie mohuć umacoŭvać adzin adnaho i spryjać miru na našym kantyniencie. Usio ŭ Kosava pryznačana dla prasoŭvańnia napierad na našym jeŭrapiejskim šlachu», — napisaŭ Chašym Tačy.
17 lutaha 2008 hoda parłamient Kosava abviaściŭ ab niezaležnaści Kosava ŭ adnabakovym paradku. Niezaležnaść respubliki ad Sierbii pryznali nie ŭsie: na siońnia jana pryznanaja niezaležnaj tolki 108 krainami-čalcami AAN. Biełaruś taksama nie pryznała niezaležnaść Kosava.
