U redakcyju tut.by źviarnułasia pracaŭnica Aršanskaha miasakansiervavaha kambinata. Jana raspaviała, što na pradpryjemstvie zarobak častkova vydajuć kuponami ŭ miascovuju kramu. «Načalnik adździeła prychodzić ź viedamaściu, raśpisvajucca i zabiraješ svaje tałony», — tłumačyć žančyna.
Supracoŭnica miasakambinata (imia nie ŭkazvajecca pa prośbie hieraini) raspaviadaje, što schiema vydačy siertyfikataŭ «dobraachvotna-prymusovaja». Jany naležać usim rabotnikam pradpryjemstva, akramia kiraŭnikoŭ, kolkaść kuponaŭ zaležyć ad pamieru zarpłaty.
- Načalnik adździeła prychodzić ź viedamaściu, raśpisvaješsia i zabiraješ svaje tałony. Zvyčajna ŭ mianie zarobak kala 500 rubloŭ na ruki, u minułym miesiacy byli vialikija premijalnyja, vyjšła750 rubloŭ. Ad hetaj sumy vyličyli 15 adsotkaŭ, heta značyć 85 rubloŭ.
Anałahičnyja situacyi na pradpryjemstvie byli ŭžo raniej, adznačaje žančyna. Pavodle jaje słoŭ, tałony vydajuć nie kožny miesiac, ale «pieryjadyčna jany źjaŭlajucca».
— Kartki-siertyfikaty ŭ druhi raz atrymlivajem, a da hetaha nam razdrukoŭvali list papiery, na jakim stavili piačatku. My išli ŭ kramu, nabirali praduktaŭ, pradaŭcy viali ŭlik pradadzienych tavaraŭ u svaich knihach, a tałony addavali ŭžo ŭ kancy miesiaca.
Žančyna taksama prykłała fatahrafiju hetych kuponaŭ - na čyrvonych siertyfikatach pakazana, što ich uładalnik moža adnačasova nabyć tavar na 5 rubloŭ u kramach «Handlovy dom «Orys». Hetaj handlovaj sietcy naležać niekalki kram, i tam pradajecca nie tolki pradukcyja miasakambinata. Adnak, pa słovach rabotnicy, cana astatnich praduktaŭ nie zaŭsiody samaja vyhadnaja.
- Tut usio pradajecca z handlovaj nadbaŭkaj, i kali ceny manitoryć, to niekatoryja tavary vychodziać daražej, čym u inšaj kramie.
Pavodle jaje słoŭ, ludzi, jakija pracujuć na miasakambinacie, taksama mohuć atrymlivać śviežyja miasapradukty ŭ lik zarpłaty. Adnak hetaja sistema ŭžo dobraachvotnaja - tavary pradajucca biez handlovaj nacenki, tamu niekatoryja rabotniki karystajucca vyhadnaj prapanovaj.
Kiraŭnictva pradpryjemstva kamientavać situacyju admoviłasia. Pieršy namieśnik dyrektara miasakambinata Alaksandr Taŭstucha tolki adznačyŭ:
- Usio vielmi źviazana z častaj źmienaj kiraŭnictva na pradpryjemstvie. Tut vykazana niezadavolenaść ahulnaja, napružanaść jość u kalektyvie. Ale heta, napeŭna, byvaje takoje.
Pavodle ahulnaha prava najmalnik abaviazany vypłačvać zarabotnuju płatu supracoŭnikam u biełaruskich rublach. Zamiena hrašovaj apłaty całkam abo častkova naturalnaj apłataj (naprykład, pradukcyjaj ułasnaj vytvorčaści kampanii) dapuskajecca tolki sa zhody rabotnika.
Prapanova najmalnika ab vydačy zarpłaty ŭ naturalnaj abo źmiašanaj (naturalnaj i hrašovaj) formie moža być jak vusnaj, tak i piśmovaj. A voś zhodu rabotnika na atrymańnie zarpłaty ŭ takoj formie najmalniku metazhodna atrymać u piśmovaj formie, kab paźbiehnuć kanfliktnych situacyj u budučyni.
