Hurt «J:mors» razam z prajektam Letim.by pradstaviŭ u internecie klip na pieśniu «Kryły» pra pieršy biełaruski kruhaśvietny avijapieralot. U rolik uvajšli dakumientalnyja kadry, źniatyja piłotami na praciahu ŭsiaho padarožža: ad biełaruskich lasoŭ da amierykanskich raŭnin i biaskrajnich prastoraŭ Atłantyki.
U žniŭni-vieraśni 2018 hoda biełarusy Alaksandr Cencier i Andrej Barysievič na Cessna 182T ź biełaruskim riehistracyjnym numaram EW 490-LL ablacieli vakoł ziamnoha šaru. Za 30 dzion padarožža jany pieraadoleli 30 tysiač kiłamietraŭ, u tym liku takija asabliva składanyja častki, jak pieralot nad Atłantyčnym akijanam. I heta ŭsio na adnamatornym vintavym letaku daŭžynioj mienš za 10 mietraŭ.
— U mianie «J:mors» užo dziesiać hod siarod ulubionych hurtoŭ, — kaža piłot Andrej Barysievič. — Naturalna, što ŭ palocie my słuchali ich zapisy, niejkija frahmienty traplali ŭ našy Instagram-repartažy. Daviedaŭšysia pra heta, chłopcy dasłali nam pryvitańnie — zaśpiavali pieśniu «Hrenłandyja» napiaredadni našaha pralotu nad hetym vostravam. A ŭžo paśla viartańnia ŭ Minsk my sustrelisia, paznajomilisia i pasiabravali.
— Kali daviedaŭsia, što biełaruskija chłopcy vypravilisia ŭ kruhaśvietku na letaku — radavaŭsia niby dzicio! — pryznajecca lidar «J:mors» Uładzimir Puhač. — Mianie zaŭždy pryvablivali takija prajekty. Ja sam lublu padarožničać. Ale kali my prahladali dla klipa videamaterył ź pieralotu, zrazumieŭ, što z hetym ničoha nie mahčyma paraŭnać. Chiba što palot u kosmas.
Pa vynikach pieralotu Letim.by pradstavić paŭnafarmatny film, tamu klip całkam možna ličyć trejleram da jaho. A sama pieśnia «Kryły» dała nazvu novaj kancertnaj prahramie «J:mors», priemjera jakoj adbudziecca 14 lutaha ŭ Prime Hall. Kvitki ad 43 rubloŭ na sajtach Kvitki.by, Primehall.by, u kasach kłuba i horada, sałonach «Jevrosieť, «Śviaznoj», «Na śviazi» pa ŭsioj Biełarusi. Infalinija: (044) 551 77 06, (029) 851 77 06.
