Kolkaść paciarpiełych padčas akcyj pratestu ŭ Francyi dasiahnuła 47, paviedamlaje BFM.tv. Prynamsi try čałavieki atrymali surjoznyja traŭmy, adzin piešachod zahinuŭ u vobłaści Savoja. Ułady padkreślivajuć, što bolšaść paranienych paciarpieli z-za ahresiŭnych dziejańniaŭ aŭtamabilistaŭ, jakija damahajucca admieny rašeńnia ŭrada ab pavyšeńni cen na bienzin.
Pa dadzienych MUS Francyi, usiaho ŭ roznych rajonach krainy pratestujuć bolš za 120 tys. čałaviek. Častka ludziej pavodzić siabie mirna, adnak u niekalkich haradach mitynhi pieraraśli ŭ sutyknieńni z palicyjaj. Tak, u Paryžy natoŭp pasprabavaŭ prarvacca da Jelisiejskaha pałaca, adnak byŭ adcisnuty ŭzmocnienymi naradami, jakim daviałosia ŭžyć ślozaciečny haz.
Centralnaja mahistral horada — Jelisiejskija pali — z pačatku dnia pierakrytaja aktyvistami. Taksama zbolšaha niedastupny ruch pa kalcavoj darozie vakoł francuzskaj stalicy.
Kanflikty z palicyjaj byli taksama zafiksavanyja ŭ Šale, Renie, Nimie. U rajonie Amjena šašu zabłakavali bajkiery. Pavodle apošniaj infarmacyi, palicyja ŭ roznych častkach krainy zatrymała 24 čałavieki.
Udzielnikaŭ akcyj pratestu nazyvajuć «žoŭtymi kamizelkami», pakolki jany nosiać śviatłoadbivalnyja kamizelki, jakija zvyčajna vykarystoŭvajuć vadzicieli ŭ ciomny čas sutak.
Zhodna z płanami ŭrada, u nastupnym hodzie padatak na dyzielnaje paliva vyraście na 6,5%, a na bienzin — na 2,9%. Takija dziejańni ŭłady robiać z metaj baraćby z zabrudžvańniem atmaśfiery. «Jašče ŭ chodzie prezidenckaj kampanii my kazali ab namierach prahresiŭna pavyšać padatak na bienzin, a takim čynam, na vuhlarody, i takim čynam budziem pieraškadžać zabrudžvańniu navakolnaha asiarodździa», — patłumačyŭ pazicyju ŭrada premjer Eduar Šarl Filip.
Za apošni hod ceny na bienzin u Francyi vyraśli na 10—15%, pieradaje radyjo RFI. Najbolš papularnaje ŭ krainie dyzielnaje paliva padaražeła na 24%, ciapier košt litra časta pieravyšaje €1,6. U siarednim pa krainie košt litra bienzinu SP-95 (prykładny anałah AI-95) i dyzielnaha paliva składaje €1,48.
