У Францыі ў суботу працягваліся беспарадкі, звязаныя з ростам цэнаў на бензін. Паводле звестак МУС, у мітынгах узялі ўдзел больш за 120 тыс. чалавек. Частка актывістаў атакавала ўрадавыя ўстановы ў Парыжы.
Колькасць пацярпелых падчас акцый пратэсту ў Францыі дасягнула 47, паведамляе BFM.tv. Прынамсі тры чалавекі атрымалі сур'ёзныя траўмы, адзін пешаход загінуў у вобласці Савоя. Улады падкрэсліваюць, што большасць параненых пацярпелі з-за агрэсіўных дзеянняў аўтамабілістаў, якія дамагаюцца адмены рашэння ўрада аб павышэнні цэн на бензін.
Па дадзеных МУС Францыі, усяго ў розных раёнах краіны пратэстуюць больш за 120 тыс. чалавек. Частка людзей паводзіць сябе мірна, аднак у некалькіх гарадах мітынгі перараслі ў сутыкненні з паліцыяй. Так, у Парыжы натоўп паспрабаваў прарвацца да Елісейскага палаца, аднак быў адціснуты ўзмоцненымі нарадамі, якім давялося ўжыць слёзацечны газ.
Цэнтральная магістраль горада — Елісейскія палі — з пачатку дня перакрытая актывістамі. Таксама збольшага недаступны рух па кальцавой дарозе вакол французскай сталіцы.
Канфлікты з паліцыяй былі таксама зафіксаваныя ў Шале, Рэне, Німе. У раёне Ам'ена шашу заблакавалі байкеры. Паводле апошняй інфармацыі, паліцыя ў розных частках краіны затрымала 24 чалавекі.
Удзельнікаў акцый пратэсту называюць «жоўтымі камізэлькамі», паколькі яны носяць святлоадбівальныя камізэлькі, якія звычайна выкарыстоўваюць вадзіцелі ў цёмны час сутак.
Згодна з планамі ўрада, у наступным годзе падатак на дызельнае паліва вырасце на 6,5%, а на бензін — на 2,9%. Такія дзеянні ўлады робяць з мэтай барацьбы з забруджваннем атмасферы. «Яшчэ ў ходзе прэзідэнцкай кампаніі мы казалі аб намерах прагрэсіўна павышаць падатак на бензін, а такім чынам, на вугляроды, і такім чынам будзем перашкаджаць забруджванню навакольнага асяроддзя», — патлумачыў пазіцыю ўрада прэм'ер Эдуар Шарль Філіп.
За апошні год цэны на бензін у Францыі выраслі на 10—15%, перадае радыё RFI. Найбольш папулярнае ў краіне дызельнае паліва падаражэла на 24%, цяпер кошт літра часта перавышае €1,6. У сярэднім па краіне кошт літра бензіну SP-95 (прыкладны аналаг АІ-95) і дызельнага паліва складае €1,48.
Цяпер чытаюць
Новы пасол Украіны па пытаннях Беларусі: «Прызнаём Ціханоўскую лідарам. А ў Лукашэнкі няма манаполіі на голас народа»18
Каментары