Nižej — nieabjektyŭny rejtynh biełaruskich youtube-kanałaŭ, jakija — chočuć jany taho, ci nie chočuć, — ale vielmi nahadvajuć styl Dudzia.
5 miesca. «Intervjuha z Karenmanam»
Paŭhoda tamu viadučy Alaksandr Karenman vykłaŭ na svaim kanale try intervju: z alimpijskim čempijonam Uładzisłavam Hančarovym, čempijonam pa muaj-taj Vitalom Hurkovym i błohierkaj Valeryjaj Jaskievič. Bolš intervju tam niama: i hetaja dziŭnaja pieryjadyčnaść — adzin ź bičoŭ biełaruskich internet-prajektaŭ.
Zdajecca, u Alaksandra i hołas pryjemny, i pytańni časam niedurnyja, i ŭ smartfon jon asabliva nie padhladvaje — ale niešta nie tak. Kamientatary ŭžo pasprabavali prylapić jamu jarłyk «tanny Dudź» i rajać vučyć pytańni, a ŭ ruku pakłaści kalkulatar, tamahočy abo luby inšy dziŭny devajs.
Akramia taho, kamientataram nie padabajecca: «druhasnaść u fiškach, pryjomach i navat u hukach», praźmiernaść viadučaha ŭ kadry, i toje, što błytaje imiony («achacha jon jet ŭ kancy Aniaj nazvaŭ»).
I z usim hetym nielha nie pahadzicca. Choć patencyjał u hetaha viadučaha vidavočna jość, tut i spračacca nie varta.
4 miesca. «BYN flow Dorohoj»
Małady youtube-kanał ź dziŭnaj nazvaj i choć niejkimi sprobami zrabić akramia nie samoha žyvoha (i heta my jašče miakka) intervju niešta viasiołaje. Majecca na ŭvazie paciešnaja hulnia «Biełaruskaja ruletka»: naprykład, Blišč pa zahałoŭkach sprabuje adhadać, što za vydańnie cytuje jamu viadučy.
Darečy, samy śmiešny udzielnik prajekta — Uładź Kruk, adzin sa stvaralnikaŭ kanała Magashow, u jakoha bolš za 200 000 padpisčykaŭ. Praŭda, tut u videa ź jaho udziełam tolki čatyry tysiačy prahladaŭ.
Z samych vialikich minusaŭ šou — jakaść karcinki, huku i dosyć dziŭny viadučy. Ź inšaha boku, u niekatorych vypuskach na intervjujavanaha napadajuć adrazu dva viadoŭcy — što z hetaha atrymlivajecca, užo inšaja historyja, ale sproba zaličana.
3 miesto. Radyjo «Svaboda» «Intervju»
Napeŭna, samy prafiesijny youtube-kanał z usich pradstaŭlenych. Tut dobra praktyčna ŭsio: huk, śviatło, bekstejdžy (intervju z Palčysam, naprykład, zdymali na načnym dachu Minska dzieści ŭ centry). Viadučaja Kacia Markoŭskaja — praktyčna etałon taho, jak treba vieści intervju, kab nie zdavacca chamkaj, ale i nie być praściačkaj ź dziaržTB.
Biezumoŭny chit kanała — skandalny protaijerej Siarhiej Lepin, jaki adkazvaje viadučaj na biełaruskaj movie. Nabraŭ jon mienš za błohiera Palčysa, ale tut jaki ŭ kaho hust.
Praŭda, na kanale tolki dva prystojnyja intervju — i čamu Markoŭskaja tak redka vypuskaje svaje videa, niezrazumieła.
2 miesca. «Barancava. Intervju»
Na youtube-kanale Anastasii Barancavaj, viadučaj radyjostancyi «Humar FM», usiaho dva videa-intervju — ale jakija! Sa skandalnym biznesmienam Izrailevičam (tym, jaki abaraniaje restaran u Kurapatach «Pajedziem, pajadzim») i ź viadomym IT-biznesmienam i aficyjnym miljanieram Viktaram Prakapieniem.
Barancavaj atrymałasia toje, čaho nie moža zrabić cełaja armija youtube-intervjujeraŭ — jaje intervju raściahvajuć na cytaty samyja bujnyja biełaruskija miedyja. Tut šmat ekskluzivu, jość trochi pravakacyi i dosyć dramaturhii dla taho, kab dahladzieć 30-40-chvilinnyja videa da kanca.
Ale jość i adkrytyja fakapy: naprykład, u intervju z Prakapieniem, jaki ŭ litaralnym sensie kaža, jakija Anastasija pavinna zadavać jamu pytańni — a taja i zhadžajecca!
1 miesca. «Talk / Tok»
Žurnalistka, hałoŭnaja redaktarka internet-časopisa «Imiony» Adarja Huštyn zaŭsiody tapiła za (u dobrym sensie) pravakacyjnuju žurnalistyku. Kali i čytaču cikava, i hieroju niazručna. Razam z novaj kamandaj sajta «Naša Niva», na kanale jakoj i vychodzić «Talk / Tok», atrymlivajecca «voś-voś Dudź».
Usiaho ŭ płejliście try videa, apošniaje zusim śviežaje — i znoŭ z błohierkaj Valeryjaj Jaskievič. Pryhožaje videa, akuratny huk, interjery pryjemnyja — i rezkaja Huštyn, jakaja sprabuje dacisnuć svaich hierojaŭ i litaralna vyciahvaje ź ich cikavyja adkazy. Pravakuje, cytuje, padłoŭlivaje — karaciej, robić toje, što i pavinien rabić luby narmalny intervjujer.
Nu, a toje, što sajt BT kinuŭsia hnabić viadučuju «Talk / Tok» za jaje nie samuju akuratnuju biełmovu, tolki paćviardžaje viadomuju iścinu: chajać na dziaržTB — značyć, treba hladzieć.