Biełaruś staić na miažy straty svaich zołatavalutnych reziervaŭ, zajaviŭ były staršynia praŭleńnia Nacyjanalnaha banka Stanisłaŭ Bahdankievič 11 śniežnia na pres‑kanfierencyi ŭ Minsku.
«Siońnia reziervy ŭ nas tolki 3 młrd. dołaraŭ. My 1 młrd. dołaraŭ «źjeli» litaralna za apošni miesiac», — zajaviŭ eks‑kiraŭnik Nacbanka.
Na jaho dumku, kali zołatavalutnyja zapasy buduć skaračacca takimi tempami, to chutka ich u krainy naohuł nie zastaniecca.
Vyjście z najaŭnaj situacyi eks‑kiraŭnik Nacbanka bačyć u «płaŭnaj devalvacyi» biełaruskaj nacyjanalnaj valuty na 20‑30% na praciahu 2009 hoda, a taksama ŭ vyrašeńni prablemy deficytu handlovaha bałansu.
S.Bahdankievič ličyć, što bankaŭskaja sistema Biełarusi siońnia nahadvaje «burbałku, jakaja moža łopnuć».
Zhodna sa źviestkami Nacbanka, mižnarodnyja reziervovyja aktyvy Biełarusi, raźličanyja pa standartach MVF, na 1 śniežnia 2008 hoda skłali 3 młrd. 775 młn. dołaraŭ ZŠA, skaraciŭšysia za listapad na 276,8 młn. dołaraŭ. Adnak
Nacbank nie raskryvaje infarmacyju, ci ŭklučany ŭ hetuju statystyku 1 młrd. dołaraŭ atrymanaha ŭ listapadzie rasijskaha kredytu. Kali jon taksama adlustravany ŭ hetych źviestkach, to skaračeńnie zołatavalutnych zapasaŭ krainy za listapad skłała 1 młrd. 276 młn. dołaraŭ.
Skaračeńnie zołatavalutnych reziervaŭ Biełarusi adznačajecca na praciahu čatyroch miesiacaŭ — na 68,1 młn. dołaraŭ ZŠA ŭ kastryčniku, na 459,7 młn. dołaraŭ u vieraśni i na 44,6 młn. dołaraŭ u žniŭni.