U internet trapili asabistyja źviestki niamieckich palitykaŭ roznych uzroŭniaŭ, uklučajučy kanclera Mierkiel. Pašparty, kredytki, adrasy, numary telefonaŭ, pierapiska palitykaŭ źjavilisia ŭ internecie naprykancy śniežnia, paviedamlaje DW.
Asabistyja danyja i dakumienty sotniaŭ niamieckich palitykaŭ, siarod jakich akazałasia i kancler Niamieččyny Anhieła Mierkiel (Angela Merkel), byli vystaŭlenyja na ŭsieahulny ahlad u internecie jak miarkujecca, u vyniku kibierataki. Pra heta ŭ piatnicu, 4 studzienia, na pres-kanfierencyi ŭ Bierlinie paviedamili aficyjnyja pradstaŭniki ŭrada i ministerstva ŭnutranych spraŭ Niamieččyny.
U Sietku patrapili danyja kredytnych kart, numary telefonaŭ, adrasy, asabistyja i ŭnutrypartyjnyja dakumienty, takija jak pašparty, rachunki, listy, zaprašeńni, zajaŭki na naviedvańnie partźjezda i navat źmieściva čataŭ deputataŭ usich partyj, pradstaŭlenych u bundestahu, a taksama deputataŭ ziamielnych łandtahaŭ, niamieckich siabraŭ Jeŭraparłamienta i palitykaŭ kamunalnaha ŭzroŭniu. Akramia taho, apublikavanyja asabistyja danyja šeraha dziejačaŭ kultury i žurnalistaŭ.
Jak paviedamiła pradstaŭnik urada Niamieččyny Marcina Fitc (Martina Fietz), siarod apublikavanych danych kanclera Mierkiel nie vyjaŭlena kanfidencyjnych abo sakretnych materyjałaŭ. Nieviadomyja apublikavali adrasy elektronnaj pošty i numar faksa Mierkiel, a taksama niekalki listoŭ.
Pa słovach Fitc, da rasśledavańnia incydentu padklučylisia Fiederalnaje viedamstva biaśpieki ŭ śfiery infarmacyjnych technałohij (BSI), Fiederalnaje viedamstva pa kryminalnych spravach i Fiederalnaje viedamstva pa achovie kanstytucyi.
Pradstaŭnik MUS taksama paviedamiŭ, što viedamstvy praviarajuć, ci była heta chakierskaja ataka. Pa adnoj ź viersij, niechta, jaki maje dostup da pryvatnych danych u siłu svajoj dziejnaści, moh raskryć infarmacyju. Užo viadoma, što ŭciečka danych adbyłasia nie praz uradavuju sietku. Praviarajecca viersija ab mahčymym kradziažy danych praz unutranuju sietku bundestaha.
