Biełaruskaja sacyjał-demakratyčnaja partyja (Hramada) prapanavała vyjhrać videarehistratar. Dla hetaha treba było nakleić na svajo aŭto vyjavu Pahoniu, zrabić sełfi i dasłać fota arhanizataram.
U vyniku pieramožcam staŭ 60-hadovy minčuk Uładzimir Leanovič. Jon kaža, što pra takuju inicyjatyvu z Pahoniaj jamu raskazała dačka: «Jana ŭ mianie bolš prasunuta ŭ kampjutarach. Jana i dasyłała fota».
Čamu dałučyŭsia? «Mnie hety hierb zaŭsiody byŭ bolš blizki za ciapierašni, jak i bieł-čyrvona-bieły ściah. Ja ŭ 2007 hodzie navat u Litvie kupiŭ značok z Pahoniaj i našu jaho pa siońnia, nie saromiejusia. Jany tam trošku roźniacca, naša i litoŭskaja, ale ŭsio adno — heta Pahonia».
Sam Uładzimir Hienadźjevič ni ŭ jakich palityčnych arhanizacyjach nie byŭ. «Tolki ŭ savieckija časy byŭ siabram KPSS, tady šmat chto byŭ», — tłumačyć jon. Na mitynhi jon taksama nie chadziŭ: «Raniej pracy šmat było, a ciapier niešta nijak nie dajdu».
Ciapier Uładzimir Leanovič na piensii. Jon pracavaŭ inžynieram-budaŭnikom, skončvaŭ viačerni instytut u Minsku. Darečy, jon karenny žychar stalicy, u paśviedčańni ab naradžeńni staić, što naradziŭsia jašče ŭ Stalinskim rajonie Minska. Baćka Uładzimira byŭ rodam ź Dziaržynskaha rajona, a mama naradziłasia ŭ Šabanach.
