Žychara Miadzielskaha rajona pryznali vinavatym u tym, što jon sa znajomym vyvieźli dvuch mužčyn u les, źbili ich, a adnaho ź ich navat pryviazali da mašyny i ciahali pa ziamli, piša kraj.by.
U lipieni pad Miadziełam dvoje mužčyn zładzili razborki z-za nibyta skradzienych 50 rubloŭ. Paśla zastolla jany paličyli, što hrošaj nie chapaje, i padazreńnie trapiła na dvuch piečnikoŭ, jakija rabili ramont u ich domie napiaredadni.
Padazravanyja adšukali mužčyn i siłaj vyvieźli ŭ les kala vioski Azarki. Tam źbivali, patrabavali hrošaj, a potym pryviazali adnaho da mašyny i ciahnuli pa darozie kala 700 mietraŭ. Achviary zmahli źbiehčy, adzin ź ich trapiŭ u špital z čerapna-mazhavoj traŭmaj, pierałomami i ranami.
Sprava dajšła da suda. Ale tak jak adzin ź fihurantaŭ za hety čas pamior, za ŭčynak pryjšłosia adkazvać žycharu Miadzielskaha rajona.
Mužčynu abvinavačvali pa artykułach ab niezakonnym pazbaŭleńni svabody i katavańni. Usio heta, pa dadzienych sa spravy, jon ździejśniŭ pjanym. Sud prysudziŭ abvinavačanaha da 6 hadoŭ pazbaŭleńnia voli ŭ kałonii ŭzmocnienaha režymu i štrafu ŭ 100 bazavych vieličyniaŭ (2 550 rubloŭ).
Prysud jašče nie ŭstupiŭ u siłu i moža być abskardžany.