Miaśnikovič — źleva, Duda — sprava
Polšča hatova arhanizavać vizit u Minsk kiraŭnikoŭ MZS krain Vyšahradskaj hrupy (Polšča, Čechija, Słavakija, Vienhryja) i inicyjatyvy Jeŭrapiejskaha sajuza «Uschodniaje partniorstva».
Pra heta ŭ intervju haziecie «SB. Biełaruś siehodnia» raskazaŭ staršynia Savieta Respubliki Michaił Miaśnikovič pa vynikach aficyjnaha vizitu biełaruskaj parłamienckaj delehacyi ŭ Polšču.
Parłamienckaja delehacyja sustrełasia z kiraŭnictvam Polščy. Na pieramovach baki abmierkavali, jak padniać biełaruska-polskija adnosiny na bolš vysoki ŭzrovień.
«Buduć aktyvizavanyja kantakty na vysokim uzroŭni, biznes-supolnaści dadzieny pazityŭnyja sihnały. Polšča padtrymlivaje praces palapšeńnia stasunkaŭ Biełarusi ź ES i zacikaŭlena ŭ jak maha bolš chutkim padpisańni pahadnieńnia ab spraščeńni vizavaha režymu, vysoka aceńvaje ŭkład kiraŭnictva Biełarusi ŭ minskija pahadnieńnia, — adznačyŭ Michaił Miaśnikovič. — Polski bok hatovy arhanizavać vizity ŭ Minsk ministraŭ zamiežnych spraŭ krain Vyšahradskaj hrupy i inicyjatyvy ES «Uschodniaje partniorstva», aktyŭna vystupaje za zaprašeńnie Biełarusi na mižnarodnyja samity, u tym liku na mierapryjemstvy, źviazanyja ź dziesiacihodździem «Uschodniaha partniorstva».
Śpikier dadaŭ, što polski bok z zadavalnieńniem pryniaŭ zaprašeńni na II Jeŭrapiejskija hulni, śviatkavańnie 1000-hodździa Bresta i inšyja mierapryjemstvy.
Uzrovień raźvićcia palityčnych kantaktaŭ pamiž Biełaruśsiu i Polščaj nie adpaviadaje isnujučamu patencyjału i mahčymaściaŭ, kanstatavaŭ staršynia Savieta Respubliki.
«Nie sakret, što biełaruska-polskija adnosiny składvalisia niaprosta. Jość dobryja prykłady i nie vielmi. Ale ŭ biełarusaŭ zaŭsiody pieravažała dobraje staŭleńnie da palakaŭ. Miarkuju, što dvuchbakovaje partniorstva moža być bolš dynamičnym i sistemnym», - skazaŭ jon.