Z novaha hodu razdrobavyja ceny na pradukty multymedyja mohuć vyraści ŭ Biełarusi ŭ čatyry-piać razoŭ. Da takoj vysnovy pryjšli indyvidualnyja pradprymalniki, jakija zajmajucca pastaŭkami ŭ našuju krainu navinak videaprakatu i kamputarnych prahramaŭ. Pavodle ich słoŭ, paśla ŭviadzieńnia specyjalnych akcyzaŭ usie papularnyja pradukty padaražajuć niezaležna ad sytuacyi na rynku. U vyniku razdrobavaja cana kamputarnych i videadyskaŭ moža dasiahnuć rekordnaj dla našaj krainy adznaki ŭ 55-80 dalaraŭ.
Jak vynik, pradaŭcy multymedyjnaj pradukcyi prahnazujuć źnižeńnie pakupnickaha popytu i zakryćcio sietki drobnych handlovych kropak. Na dadzieny momant hurtavaja cana adnaho nielicenzijnaha DVD-dyska składaje niedzie dva dalary. Licenzijnyja nośbity kaštujuć daražej – ad 7-15 dalaraŭ. U razdrob dyski vystaŭlajucca pa 25-40 tysiač biełaruskich rubloŭ. Kali adbudziecca niepradbačany cenavy skačok, to za navinki kinaprakatu biełarusam daviadziecca vykładać pa 100 tysiačaŭ rubloŭ.
Pry ciapierašnim uzroŭni dachodaŭ hramadzian, kažuć pradprymalniki, realizoŭvać dyski pa takoj canie budzie niemahčyma. Nia tak daŭna rasiejskija pastaŭščyki padniali zakupačny košt adzinki tavaru ŭsiaho na 2 dalary. Hetaha akazałasia dastatkova, kab biełaruskija pakupniki adviarnulisia ad padaražałaj licenzii i stali aktyŭniej skuplać pirackija dyski.
Zrešty, tavar ad rasiejskich flibuśćjeraŭ taksama čakaje maštabnaja pieraacenka. Kali ŭličyć, što ź pieršaha studzienia nastupnaha hodu na kožny ŭviezieny dysk musić kleicca akcyznaja marka, impartnyja dyski mohuć stać u Biełarusi vialikaj redkaściu. Što da kančatkovaj cany ŭ 55-80 dalaraŭ za dysk, to hramadzianie ZŠA i krainaŭ Eŭraźviazu daŭno da jaje pryzvyčailisia.
