Mścisłaŭski rajonny adździeł Śledčaha kamitetu zavioŭ kryminalnuju spravu pa fakcie ŭžyvańnia hvałtu supracoŭnikam milicyi suprać dvuch hramadzian. Svaboda pahavaryła z paciarpiełym.
Pieršym infarmacyju apublikavaŭ ŭ Telegram błohier Nexta.
Va ŭpravie Śledčaha kamitetu Mahiloŭskaj vobłaści paviedamili, što suprać byłoha ŭčastkovaha inspektara 1986 hodu naradžeńnia była zaviedziena sprava za pieravyšeńnie ŭłady ci słužbovych paŭnamoctvaŭ, učynienaje z karyślivaj abo inšaj zacikaŭlenaści (3-ja častka 426 artykuła KK).
Jak stała viadoma Svabodzie, ad hvałtu ŭčastkovaha inspektara paciarpieli dvoje žycharoŭ vioski Karobčyna, jakich zatrymali za administracyjnyja pravaparušeńni. Adbyłosia heta 16 listapada 2018 hodu ŭ pamiaškańni Mścisłaŭskaha rajadździełu milicyi.
6 lutaha 2019 hodu milicyjanta, jaki mieŭ zvańnie małodšy lejtenant, zvolnili, kantrakt ź im skasavany daterminova, na jaho zaviali kryminalnuju spravu.
Adzin z paciarpiełych paviedamiŭ Svabodzie, što budzie damahacca pakarańnia vinavatych u parušeńni jahonych pravoŭ. Jon viedaje, što suprać byłoha milicyjanta raspačataja kryminalnaja sprava i abstaviny zdareńnia jašče raśśledujucca. Mužčyna nastojvaje, što supraćpraŭnyja dziejańni čyniŭ nia tolki zvolnieny ŭčastkovy inspektar, ale jašče i 7 jahonych kalehaŭ.
«Tamu ja nie źbirajusia ŭsiu vinu ŭskładać na adnaho, — kaža paciarpieły. — Tam było 8 supracoŭnikaŭ u formie. Siamiora dahetul pracujuć. Toje, što znojdzieny «achviarny kazioł» — heta mnie nie cikava. Prosta tak spravu ja nie źbirajusia kidać».
Paciarpieły admoviŭsia havaryć pra abstaviny incydentu ŭ milicejskim pastarunku.
Svajak adnaho z paciarpiełych skazaŭ Svabodzie, što dvoje mužčyn u dzień incydentu pryjšli ŭ pašpartny stoł. Milicyjantaŭ aburyła, što mužčyny nibyta byli napadpitku. Ich zavieźli ŭ pastarunak i tam pačali źbivać dubinkami. Adnamu ź ich tak paškodzili nahu, što paśla daviałosia nakłaści hips.
Druhi paciarpieły paźniej taksama abiacaŭ vykazać Svabodzie svaju pazycyju.
Milicyjantu, jakoha vinavaciać u pieravyšeńni słužbovych paŭnamoctvaŭ, pahražaje da šaści hadoŭ pazbaŭleńnia voli.