Mienski rajonny sud aštrafavaŭ na 1020 rubloŭ (40 bazavych vieličyniaŭ) abaroncu Kurapat, staršyniu «Maładoha frontu» Dzianisa Ŭrbanoviča. Jaho pryznali vinavatym u niepadparadkavańni milicyi padčas pikietavańnia restaracyi «Pojediem pojedim» kala Kurapat, piša «Radyjo Svaboda».
Epizod, jaki razhladaŭ sud, adbyŭsia ŭviečary 23 lutaha. Dzianis Urbanovič stajaŭ razam ź inšymi pikietoŭcami kala bramy restaracyi. Jany spyniali aŭtamabili i tłumačyli kiroŭcam, čamu treba bajkatavać zabaŭlalnuju ŭstanovu, raźmieščanuju kala miesca masavych rasstrełaŭ. Adzin z kiroŭcaŭ vyklikaŭ supracoŭnikaŭ DAI.
Voś što adbyvałasia paźniej, pa słovach śviedki — supracoŭnika DAI Vitala Vaŭčanina:
«My skłali pratakoł na Ŭrbanoviča. Čamu na jaho? Bo jon peŭna tam znachodziŭsia, a my papiaredzili ŭsich, što jany parušajuć zakon, admaŭlajučysia syści z darohi, ale na zaŭvahu nichto nie adreahavaŭ».
Ci zrabiŭ chto z supracoŭnikaŭ zaŭvahu niepasredna Ŭrbanoviču? Adkazać na hetaje pytańnie sudździ Viktara Šaŭcova śviedka nia zmoh: «Nia pamiataju».
Inšy śviedka, milicyjant Viktar Kuntyš taksama nia zmoh peŭna akreślić vinu Dzianisa Ŭrbanoviča, akramia taho, što toj «byŭ siarod pikietoŭcaŭ i admoviŭsia padpisvać pratakoł ab pravaparušeńni».
Jašče adzin śviedka, milicyjant Siarhiej Łukašaniec skazaŭ, što na Dzianisa Ŭrbanoviča jamu pakazaŭ kiroŭca, jaki patelefanavaŭ u DAI.
«Što mienavita jon pieraškadžaŭ prajezdu. Urbanoviča papiaredzili, što jon parušaje, ale jon zastaŭsia na darozie», — skazaŭ śviedka.
Miž tym, pavodle śviedki — supracoŭnika DAI Vitala Suščeni, Dzianis Urbanovič paśla składańnia pratakołu patrabavańnie milicyjantaŭ vykanaŭ: «Tak, potym jon syšoŭ z darohi na tratuar».
Što da Dzianisa Ŭrbanoviča, jon nastojvaje na tym, što da składańnia na jaho pratakołu ad jaho nichto nie patrabavaŭ syści z darohi i nie papiaredžvaŭ jaho ab adkaznaści za niepadparadkavańnie. U sudzie aktyvist admoviŭsia davać pakazańni. Raniej, u pierapynku, jon hetak raspavioŭ žurnalistam pra tyja padziei.
«Heta niapraŭda, što mianie papiaredžvali ab adkaznaści za niepadparadkavańnie. Było ŭžo ciomna. Ja bačyŭ, što da restaracyi pryjechaŭ aŭtamabil DAI, ale mnie nijakich pretenzij nichto nie vykazvaŭ, tym bolš ja ničoha nie parušaŭ».
Noč z 25 na 26 lutaha Dzianis Urbanovič adbyŭ u izalatary časovaha ŭtrymańnia na vulicy Skaryny. Na ruku i tułava aktyvista nadzieta hipsavaja paviazka. Heta nastupstva najezdu na jaho aŭtamabila kala restaracyi, incydent zdaryŭsia 16 lutaha. U aktyvista padazrajuć traŭmy siaredniaj ciažkaści. Ci dazvolena milicyjantam źmiaščać čałavieka ŭ izalatar u takim stanie?
Hetaha Dzianisu Ŭrbanoviču ŭ milicyi nichto nie patłumačyŭ. Pa jahonych słovach, u Mienskim rajadździele milicyi jon prasiŭ vyklikać da jaho lekara ci chutkuju dapamohu, kab lekary jaho ahledzieli i dali dazvoł na źmiaščeńnie ŭ izalatar.
«U mianie ž z saboj nie było abiazbolvalnych srodkaŭ, a ruka i chrybietnik balać, raptam stanie horš. Voś ja i prasiŭ z hetym razabracca, ale lekara da mianie tak i nia vyklikali. Maju skarhu, vidać, prosta vykinuli ŭ śmietnicu. Blizka da viečara zapchnuli ŭ milicejski aŭtamabil i pavieźli ŭ izalatar. Noč ja faktyčna nia spaŭ, bo ŭ kamery dušna i lažać z hipsam niazručna. Chrybietnik jašče balić», — skazaŭ Dzianis Urbanovič.
25 lutaha, Dzianisa Ŭrbanoviča vyklikali ŭ Mienskaje abłasnoje DAI pa nakiravańnie na ekspertyzu, jakuju mielisia pryznačyć na siońnia, 26 lutaha.
«Ale tolki vyjšaŭ z domu, jak adnaho ŭ hipsie 5 amapaŭcaŭ zatrymali i pavieźli ŭ Baraŭlanskaje adździaleńnie. Voś i ŭsia ekspertyza», — skazaŭ pra ŭčorašniaje zatrymańnie abaronca Kurapat Dzianis Urbanovič.
Za čas pikietavańnia restaracyi «Pojediem pojedim», z červienia 2018 hodu, Dzianisu Ŭrbanoviču čatyry razy prysudžali administracyjny aryšt. Ahułam jon adbyŭ za kratami ŭ mienskim rajonnym izalatary na vulicy Skaryny 39 dzion.
