Uročyšča Kurapaty budzie pryviedziena ŭ paradak. Ab hetym zajaviŭ Alaksandr Łukašenka siońnia na sustrečy z pradstaŭnikami hramadskaści i ekśpiertnaj supolnaści, biełaruskich i zamiežnych ŚMI, pieradaje BiełTA.
«Kurapaty my ŭ paradak pryviadziom, budźcie ŭpeŭnienyja ŭ hetym. Choča hetaha chtości ci nie choča. Tam pachavanyja našy ludzi, — skazaŭ Alaksandr Łukašenka. — A siońnia varušyć kostki ludziej i hladzieć — niemcy zastrelili, stalinisty ci jašče chtości — mnie pakul niejak nie chočacca hetaha».
Łukašenka skazaŭ, što daručyŭ uziacca za Kurapaty — ustalavać ścipły pomnik zahinułym, zrabić tam niešta dušeŭnaje, bieź vialikich vydatkaŭ, kab uviekaviečyć heta miesca. Adnak kiraŭnik dziaržavy padkreśliŭ, što paśla hetaha na jaho abrynuŭsia škvał niehatyvu. Jon dadaŭ, što tema Kurapataŭ vykarystoŭvajecca niekatorymi ŭ prapahandysckich metach.
«Tak, było. Pahladzicie na inšyja krainy — tam taksama nie tysiačy, a miljony hinuli. Ale treba vypuklić voś hety stalinski pieryjad, pakazać, što byli vorahi, — adznačyŭ jon. — Tak, byli i takija. Moža być, praźmierna. Ale heta nie značyć, što pad stalinizm treba zahaniać usio. Tam zabivali ludziej, dapuścim, pry Stalinie — u 30-ja hady. A vy ŭpeŭnieny, što tam na hetym miescy fašysty nie rasstrelvali habrejaŭ, biełarusaŭ, palakaŭ, ukraincaŭ, ruskich? Nu, tak davajcie budziem abjektyŭnymi».
Čytajcie taksama: Łukašenka: «Što kiepskaha, kali kala Kurapat restaran? Zajšli, čarku vypili»
Kiraŭnik dziaržavy zakranuŭ i temu raźbitaj «łavy Klintana» ŭ Kurapatach. Jon paviedamiŭ, što rasparadziŭsia nieadkładna jaje adnavić i nazvaŭ hłupstvam ŭsie śćvierdžańni, što ŭłady majuć da jaje paškodžańnia chacia b niejkaje dačynieńnie.
Alaksandr Łukašenka zakranuŭ i pytańni acenki historyi Biełaruskaj Narodnaj Respubliki. Prezident adznačyŭ, što tyčycca roli i značeńnia BNR, «my spakojna ruchajemsia ŭ napramku taho, kab razabracca — jak było i što było — biez prapahandy».
Čytajcie taksama: «Stahodździe — vialikaja data. Adśviatkavali». Ale nie sioleta. Łukašenka vyklučyŭ mahčymaść praviadzieńnia Dnia Voli na stadyjonie «Dynama»
Jon padkreśliŭ, što vialikaja rola ŭ dziaržavie — u adzinstvie naroda: «U nas svaich prablem dastatkova. Nijakija biazładzica — ni z Rasii, ni z Zachadu, ni dalej — nichto nas nie zhornie, kali my tut budziem adzinyja. Kali my budziem dziejničać tak, jak my z vami heta razumiejem, tak, jak u nas u hałovach. A nie tak: dumajem adnolkava, a pavodzim siabie pa-roznamu».
Kiraŭnik dziaržavy źviarnuŭ uvahu na važnaść zachavańnia tradycyj, što prajaŭlajecca i ŭ dačynieńni da da tych ci inšych śviataŭ. «Dapuścim, śviatkavańnie 9 Maja. Čamu my pavinny addać kamuści hetaje śviata? My, jakija addali kožnaha treciaha čałavieka, i pałova nasielnictva była skalečana, — nahadaŭ Alaksandr Łukašenka. — Ja byŭ aktyŭnym prychilnikam taho, kab prapahandavać, ukaraniać u śviadomaść hetaje śviata, i praz hetuju formu padciahvać moładź da dziaržaŭnaści».
Alaksandr Łukašenka taksama vykazaŭsia za zachavańnie Śviata pracy — 1 Maja. «Ale chaj heta budzie prafiesijnaje śviata, chaj prafsajuzy im zojmucca», — dadaŭ jon. Kiraŭnik dziaržavy prytrymlivajecca pazicyi, što z historyi treba zdabyvać uroki i nie pazbaŭlać ludziej mahčymaści pavažać tradycyi, adznačać niejkija śviaty. «Niachaj jany śviatkujuć. Čamu my pavinny vajavać z hetymi ludźmi? My pavinny ich razumieć», — ličyć prezident.
«Dakładna tak i BNR — nie śpiašajciesia, kali łaska. Za karotki pramiežak času my prymiem rašeńnie na dziaržaŭnym uzroŭni, na ŭzroŭni prezidenta, pa BNR. Nie śpiašajciesia. Marzaluk z hrupaj jašče troški papracuje, pahladziać plusy, minusy, jak było, čaho nie było i što było za kulisami hetaj BNR. Kab nie pamylicca. Kab my nie dali niejkuju pryčynu dla razdraju ŭ našym hramadstvie. A heta ŭžo našy dzieci buduć pažynać plon našych pamyłak, kali my pamylimsia», — padsumavaŭ Łukašenka.
