Letam abvastrajecca žadańnie źmianić abstanoŭku, vyzvalicca z zadušnaha ofisu dy na niekalki dzion zabycca na haradzki tłum. Možna nie vystojvać čerhaŭ pa vizu dy nie pakutavać bolš za sutki ŭ haračym kupe ciahnika «Miensk–Simfieropal». Dobra adpačyć možna i nie vyjaždžajučy ź Biełarusi. Vybar jość!
Ahraturyzm
U Biełarusi hety vid adpačynku źjaviŭsia paźniej za astatnija krainy Eŭropy, ale raźvivajecca dosyć aktyŭna. Na siońnia pa ŭsioj Biełarusi naličvajecca la 60 siadzibaŭ. U źviazku ź vialikaj kankurencyjaj košty na pražyvańnie ŭ takich miescach źnižajucca, a pakiet pasłuh – pašyrajecca. Standartny nabor prapanovaŭ: adpačynak la vady plus palavańnie ŭ bližejšym lesie, hrybočki-jahady dy ekskursija, kali jość kudy.
Haspadary siadziby «La dubočka», što pad Mienskam, prapanujuć naviedać padčas adpačynku… «Liniju Stalina». Choć jość i bolš vartyja prapanovy. Uładalniki fermerskaj haspadarki «Vieras» zbudavali siadzibu dla turystaŭ ź interjeram «u nacyjanalnym styli» niepadalok ad Synkavickaj carkvy. Siarod prybudovaŭ – karčma na 40 miescaŭ. Prapanavanyja maršruty – Žyrovicki manastyr, Kosaŭski i Ružanski pałacy. Dy jašče Zelva i Słonim niepadalok. Na siadzibu pracuje ŭsia zachodniebiełaruskaja vakolica.
U krainach z raźvitym ahraturyzmam ciapier modu nabiraje «fermerski adpačynak». Usio źmianiajecca: raniej fermery najmali prymakoŭ za hrošy, a ciapier bahatyja niemcy dy anhielcy, papracavaŭšy ŭ ofisach, imknucca da ziamielki. Pracujuć tydzień-dva na fermerskich haspadarkach za ježu i žytło. U spektry pasłuh biełaruskich ahrasiadzibaŭ takoha pakul niama, ale, jak skazaŭ haspadar adnoj ź ich, «možna zarhanizavać». Instrumenty zaŭždy znojducca, aby popyt byŭ.
U bližnim zamiežžy ahraadpačynak maje pierad biełaruskim adziny plus – bolš raźvitaja infrastruktura. Razam ź lesam dy rečkaj amal paŭsiul jość supermarkiety, internet-kaviarni, dobryja restaracyi. Adpačynak u padobnaj siadzibie ŭ Krynkach, što na Biełastoččynie, kaštuje 150 dalaraŭ na tydzień.
Košt pražyvańnia ŭ biełaruskich ahrasiadzibach vahajecca ad 6 da 35 u.a. na dzień, u zaležnaści ad kštałtu siadziby. Jość katedžy, viaskovyja chaty, letnija «spartanskija» pabudovy. Śpis usich siadzibaŭ možna znajści na holiday.by.
Lekavy adpačynak
Heta davoli standartny vid adpačynku, popyt na jaki trymajecca dziakujučy «prafsajuznym» pucioŭkam. Supracoŭnik dziaržaŭnaj ustanovy płacić niejki adsotak ad ahulnaha koštu dy jedzie ŭ sanatoryju-prafilaktoryju padlačyć nervy dy zaspakoić serca. Adpačynak dla tych, kamu za 30. Vybar – niekalki sotniaŭ sanatoryjaŭ pa ŭsioj krainie sa standartnym naboram pasłuh i režymam. Samyja tannyja prapanovy – pad Mienskam (300–400 tys.rub.), daražej – na biełaruskich kurortach. Poŭnaja pucioŭka na 12 dzion u sanatoryi na Naračy abydziecca ŭ 620 tys.rub.
Aktyŭny adpačynak
U Biełarusi niama mahčymaści zaniacca modnym ciapier dajvinham, safary ci banalna ździejśnić kruiz. Zatoje zastajucca spradviečnyja rybałka i palavańnie. Da ich dapasoŭvajucca bolš ekstremalnyja pejntboł i skački z parašutam.
Zajmacca lehalna palavańniem kaštuje niemałych hrošaj. Uličvajecca nia tolki płata za trafej (50–300 eŭra), ale i płata supracoŭnikam, vyvaz trafeju. Śpis miescaŭ palavańnia i rascenak.
Rybačyć tańniej. Dzień rybałki – 15–50 tysiač. Adna z najpapularniejšych miaścinaŭ – Lubanskaje vadaschovišča, dzie, što praŭda, za ŭłoŭ bolš za 5 kh treba płacić asobna.
Sapraŭdny bum hetym letam – na skoki z parašutam. Mienski aeraklub na Baravoj navat uvioŭ papiaredni zapis, bo achvočych bolej, čym parašutaŭ. Suadnosna z popytam padvyšajucca i košty na skoki. Sioleta jany składajuć ad 12 da 17 u.a. za adzin raz.
Modnaja hetym letam zabava – lasny pejntboł. Hulni adbyvajucca ŭ lasach dy zakinutych budyninach pad Mienskam, arhanizatary pazycyjanujuć zabaŭku jak dastupnuju dla ŭsich, i jak najvydatniejšy sposab vyzvalicca ad admoŭnych emocyjaŭ. Košt na dzień – la 30 tys.rub. na čałavieka. Infarmacyju možna znajści tut.
Ekskursijny adpačynak
Heta dla tych, chto choča nabracca ŭražańniaŭ dy lepiej spaznać krainu za ścisły termin. Siarod turystyčnych maršrutaŭ, jakija prapanoŭvajuć biełaruskija ahiencyi, zredčas adšukaješ niešta cikavaje. Choć, jak skazali ŭ adnoj ź ich, popyt na ahladnyja vandroŭki (2–4 dni) pa Biełarusi padvyšajecca ŭletku. Šmat jakija ahiencyi ŭ standartnyja maršruty vymušany byli pa raznaradcy ŭłučyć «Liniju Stalina» (jak kaliści Kurhan Słavy). Tak što nie ździŭlajciesia, kali pabačycie taki maršrut: Miensk – «Linija Stalina» – Mir – Niaśviž – Połacak. Košt takich vandrovak siahaje 100 dalaraŭ.
Niezaležnyja arhanizatary vandrovak abirajuć nie takija źbityja maršruty (u niekatorych miaścinach da ich turystyčny aŭtobus nie prajaždžaŭ) i košty vystaŭlajuć bolš demakratyčnyja. Uvažliviej prahladajcie abviestki ŭ «NN»!
Siarhiej Budkin
Fota Andreja Lankieviča
