Roznaŭzrostavuju biełaruskamoŭnuju hrupu płanujuć adkryć u 210 sadku. Pra heta baćkam-inicyjataram paviedamili ŭ Pieršamajskim rajvykankamie stalicy. 210 sadok mieścicca na vulicy Kalinoŭskaha, 39.
«Razmova z zahadčycaj mnie spadabałasia, — kaža adna ź inicyjatarak stvareńnia sadka Volha. — Zahadčyca nacelenaja iści nasustrač usim našym pažadańniam, abiacaje prykładać usie namahańni, kab praces vychavańnia i adukacyi byŭ maksimalna na rodnaj movie, muzyčnyja zaniatki i fizkultura — taksama!» — adznačaje jana.
Nabor u hrupu budzie, jak i va ŭsich sadkach, — da 1 vieraśnia. Prymajucca dzieci ad 3 da 7 hadoŭ. Ale kali dziciaci spaŭniajecca 3 hady ŭ vieraśni ci kastryčniku, to jaho taksama voźmuć u hrupu.
«Sama hrupa, pamiaškańnie, davoli vialikaja, spalnych miescaŭ — 21. Vitalny pakoj — prastorny, usia infa na stendach — pa-biełarusku. Interjer hrupy aformleny ŭ etna-styli», — raskazvaje Volha.
Dla taho kab trapić u hrupu, baćki pavinny ŭ słužbie «Adno akno» Pieršamajskaha vykankama paznačyć u zajavie 210-y sadok i biełaruskuju movu navučańnia.
Zhodna z zakanadaŭstvam, žychary inšych rajonaŭ Minska taksama mohuć stać na čarhu ŭ Pieršamajskim vykankamie i paznačyć 210-y sadok.
Kali dzietki naviedvajuć inšy sadok i baćki vyrašajuć źmianić jaho na 210-y, jany pavinny zrobić toje samaje.
Biełaruskamoŭnyja baćki kaardynujucca ŭ śpiecyjalna stvoranym vajbier-čacie «Dzietki-kvietki». Teł. Volhi, kaardynatarki stvareńnia hetaha sadka: (029) 260-05-03.
