23 śniežnia 2008 hodu prapanova dalaraŭ ZŠA na Biełaruskaj valutna‑fondavaj biržy skłała $506,262 młn. Heta niezvyčajna šmat. Našmat bolš za zvyčajnyja pakazčyki. Jana pieravyšała popyt ($88,924) u 6 razoŭ.
Kab vy paraŭnali, voś jakija pakazčyki popytu i prapanovy naziralisia ŭ inšyja dni apošnich tydniaŭ:
Data prapanova \ popyt
5.01 37,95 (popyt 57,16)
24.12 314,72 (popyt 321,26)
23.12 506,26 (popyt 88,92)
22.12 80,27 (popyt 107,09)
19.12 63,34 (popyt 83,58)
18.12 59,16 (popyt 93,09)
17.12 47,04 (popyt 102,39)
16.12 47,56 (popyt 71,7)
Jak bačym, 23 śniežnia — adziny taki dzień, kali prapanova našmat pieravyšała popyt (pryčym tolki pa dalarach), i, tym nie mienš, nasupierak łohicy, heta nie pryviało da źnižeńnia kursu. Uźnikaje intryhoŭnaje pytańnie, chto pradaŭ i chto kupiŭ až $417 młn niepasredna pierad abvałam, tady, kali rašeńnie pra devalvacyju, niesumnienna, było ŭžo pryniata, ale trymałasia ŭ strohaj sakretnaści?
Dniom raniej prapanova na dalary była amal na 30 miljonaŭ mienšaj za popyt — kala $80 młn suprać — $107 młn. 24 śniežnia, u apošni dzień tarhoŭ, prapanova znoŭ była mienšaja za popyt — $314,7 młn suprać $321,3 młn.
Darečy, hety razryŭ miž popytam na valutu i prapanovaj i pryvodziŭ da padzieńnia zołatavalutnych zapasaŭ krainy. Nacbanku prychodziłasia pradavać ułasnyja zapasy valuty, kab zadavolić popyt pradpryjemstvaŭ.
Ličby, zafiksavanyja na tarhach BVFB 23 śniežnia, spravakavali ŭsialakija čutki i śpiekulacyi. Maŭlaŭ, peŭnyja asoby i arhanizacyi na tym zarabili. «NN» źviarnułasia da BVFB i Nacbanku z prośbaj rastłumačyć situacyju.
Načalnik upraŭleńnia infarmacyi Nacbanku Anatol Drazdoŭ raskazaŭ, što ŭ vypadku, kali ŭ časie handlu zamiežnymi valutami na BVFB prapanova pieravyšaje popyt, reštu nabyvaje Nacbank, a nie jakija tam pryvatnyja asoby. Pa jaho słovach, ničoha ekstraardynarnaha ŭ vynikach tarhoŭ 23 śniežnia niama: byli zatrymki ŭ płaciažach, bo šmat chto z pastaŭščykoŭ, zvažajučy na finansavy kryzis, prasiŭ adterminoŭki, akramia ŭsiaho — kaniec hodu, kali subjekty haspadarańnia pradajuć valutu.
Takim čynam, skupiŭ Nacbank. A chto ž pradaŭ, ličy, pa niavyhadnym kursie?
Namieśnik staršyni praŭleńnia BVFB Siarhiej Cińnikaŭ supakojvaje, što rezki rost prapanovy dalaraŭ ZŠA ŭ časie handlu zamiežnymi valutami — heta siezonnaja źjava. «Niama tut nijakaha sakretu, bo my jašče za dva tydni da hetaha paviedamili pra apošnija terminy handlu valutami. I taki ŭsplosk u pieradapošni dzień tarhoŭ całkam naturalny». Adkazvajučy na pytańnie pra mahčymaść niejkich manipulacyj pierad devalvacyjaj, S.Cińnikaŭ adznačyŭ, što ŭstalavanyja na BVFB praviły całkam vyklučajuć heta. Pa jaho słovach, kali niechta daśviedčany zachacieŭ by skarystacca ź situacyi, to zrabić heta było b praściej praź Mižbankaŭskuju valutnuju biržu. Praź Mižbank prachodziać u razy bolšyja abjomy valuty, padkreśliŭ namieśnik staršyni praŭleńnia BVFB.
Adnak tłumačeńnie sp.Cińnikava nie zdymaje pytańniaŭ: tak, 24 śniežnia, u apošni dzień pierad pierapynkam u dziejnaści BVFB, abjomy tarhoŭ sapraŭdy byli pavialičanyja, i heta łahična, ale taksama łahična, što i prapanova była pavyšanaja: kamuści tre było pradać, kab zapłacić zarobki z premijalnymi dy padatki, a kamuści — nabyć. I toje łahična ŭ apošni pieradkaladny dzień. Ale nie ŭ pieradapošni.
Tłumačeńnie ŭdałosia adšukać u finansavych kołach.
Jak patłumačyli našamu karespandentu, šerah bujnych pradpryjemstvaŭ‑eksparcioraŭ vymusili pradać ŭ pieradapošni dzień tarhoŭ nazapašanuju valutu. Kurs dalara ZŠA na BVFB składaŭ 2200 biełaruskich rubloŭ. Vychodzić, dziaržava zarabiła dvojčy.Jana zarabiła na devalvacyi, u vyniku jakoj rubiel, a ź im našy zarobki i aščadžeńni źniacenilisia na 20%. Jana zarabiła i na eksparciorach, jakich «ratavała» devalvacyjaj, skupiŭšy ad ich valutu prymusam pa niavyhadnym kursie.
Tak što nijakich śpiekulantaŭ — dziaržaŭnaja vyhada.
