Ekzit-poł, praviedzieny pułam sacyjałahičnych centraŭ (pa stanie apytańnia na 18.00), %:
Zialenski 30,4
Parašenka 17,8
Cimašenka 14,2
Bojka 9,8
Hrycenka 7,1
Śmiaško 6,4
Laško 4,8
Viłkuł 4,0
Kašulinski 1,8
Ekzit-poł SOCIS, %
Zialenski 29,25
Porošienko 19,19
Cimašenka 13,75
Bojka 9,24
Hrycenka 7,91
Ekzit-poł 112 + NewsOne
Zialenski 30,7
Parašenka 18,6
Cimašenka 13,9
Bojka 10,3
Hrycenka 7,3
Śmiaško 6,6
Laško 4,3
Viłkuł 3,3
Kašulinski 2,0
Vyniki ekzit-połaŭ mała adroźnivajucca ad źviestak sacyjołahaŭ pierad hałasavańniem. Parašenka nabraŭ najbolš hałasoŭ tolki na zachadzie Ukrainy. U centry, na poŭdni i ŭschodzie pieramahaje Zialenski. U toj ža čas Parašenka abychodzić Cimašenku na niekalki pracentaŭ hałasoŭ va ŭsich rehijonach.
Źviartaje ŭvahu vychad u pieršuju šaściorku kandydataŭ Śmiaško — byłoha kiraŭnika Słužby biaśpieki Ukrainy pry prezidencie Kučmie. Imavierna, jon pastarajecca zamacavać svoj pośpiech na parłamienckich vybarach.
Paviedamlajecca, što Julija Cimašenka ŭžo abmiarkoŭvaje ź Zialenskim umovy padtrymki jaho kandydatury ŭ druhim tury.
Rasija dała vyrazna zrazumieć, što chacieła b, kab Piatro Parašenka prajhraŭ. Maskvie važna pakazać, što nijaki prezident nie moža mieć tryvałuju ŭładu ŭ Kijevie biez kampramisaŭ z Maskvoj.
U 2014 hodzie Maskva ŭ pakarańnie za prajeŭrapiejski kurs Ukrainy anieksavała Krym i adarvała Danbas. Parašenka byŭ abrany ŭ situacyi faktyčnaj vajny, kali stajała pahroza straty paŭdniovaj pałovy krainy.
Parašenku ŭdałosia stabilizavać situacyju. U jaho aktyvie — stvareńnie bajazdolnaj armii, adnaŭleńnie ekanamičnaha rostu, zdabyćcio ŭkrainskaj carkvoj aŭtakiefalii i ŭviadzieńnie biaźvizavaha režymu ź Jeŭrasajuzam. Paśla 2015 hoda Ukraina ŭtrymlivała liniju frontu ŭ Danbasie, a mnohija kiraŭniki prarasijskich bojefarmiravańniaŭ byli źniščany kropkavymi teraktami. Siarod ich i kiraŭnik «Danieckaj Narodnaj Respubliki» Zacharčanka.
U toj ža čas ukrainskich vybarščykaŭ turbujuć bolš prazaičnyja rečy. Kaznakradstva va Ukrainie praciahvałasia, a tempy ekanamičnaha rostu byli nievysokija. Ukraina zastajecca krainaj z najnižejšymi ŭ Jeŭropie zarobkami, heta nie škodziła prezidentu Parašenku adpačyvać na Maldyvach. Mienavita tamu, niahledziačy na ŭsie zasłuhi ŭ dziaržaŭnym budaŭnictvie, Parašenka zastajecca ŭ lidarach antyrejtynhu — 49%, što ŭskładniaje jaho pierśpiektyvy ŭ druhim tury, navat kali jon vyjdzie tudy.
Prezident Biełarusi Alaksandr Łukašenka pradkazaŭ pieramohu Piatra Parašenki, što možna razhladać jak žest padtrymki ź jaho boku. Pry Parašenku Ukraina pravodziła aściarožny kurs u adnosinach ź Minskam, kab Biełaruś zachavała niejtralitet u rasijska-ŭkrainskim kanflikcie, niahladziačy na najaŭnaść biełaruska-rasijskaha sajuza.
Jak kažuć sacyjołahi, najbolšyja šancy na pieramohu maje komik Uładzimir Zialenski, jaki źbiraje pratestavyja hałasy i papularny siarod moładzi. Jon ciesna źviazany z aliharcham Iharam Kałamojskim, jaki kantraluje mnohija dachodnyja śfiery ŭkrainskaj ekanomiki. U vypadku pieramohi Zialenski stanie pieršym čałaviekam jaŭrejskaha pachodžańnia na pasadzie prezidenta Ukrainy.
Prychod da ŭłady inšaj aliharchičnaj hrupoŭki naŭrad ci pryviadzie da rezkaha viražu ŭ palityčnym i ekanamičnym kursie Ukrainy. U toj ža čas źmienaŭ možna čakać u kulturnaj palitycy. Piatro Parašenka pravodziŭ kurs na ŭmacavańnie nacyjanalnaj identyčnaści. Naŭrad ci takaja palityka budzie blizkaja Zialenskamu, jaki nie havoryć pa-ŭkrainsku i maje najbolšuju padtrymku na poŭdni. Parašenka na hetych vybarach maje najbolšuju padtrymku na zachadzie i ŭ centry krainy. Choć u cełym u paraŭnańni z vybarami 2004 i 2010 hadoŭ rehijanalnyja adroźnieńni zhładzilisia.
Padtrymku kursu na Jeŭrasajuz i NATO dekłarujuć usie try samyja papularnyja kandydaty.
Miarkujecca, što pierad druhim turam bolšaść kandydataŭ padtrymaje Zialenskaha. U toj ža čas prychilniki Parašenki ŭskładajuć spadziavańni na teledebaty.
Ciapier čytajuć
Novy Niurnbierh. Jeŭropa stvaraje Śpiectrybunał pa vajnie va Ukrainie — ci zmohuć asudzić Łukašenku?7
Kamientary