Praviadzieńnie ŭ Rasii padatkovaha manieŭru, jaki paharšaje dla Biełarusi ŭmovy handlu naftaj, parušaje dahavor ab Jeŭrazijskim ekanamičnym sajuzie (JEAES), zajaviŭ biełaruski pasoł u Rasii Uładzimir Siamaška ŭ intervju «Rośsijskoj hazietie».
Dypłamat nahadaŭ, što u 2019 hodzie zakančvajecca dziejańnie pratakoła ab cenach na haz, składzienaha ŭ 2017-m. Pavodle słoŭ Siamaški, biełaruski bok užo dvojčy nakiroŭvaŭ prapanovy pa mietodykach raźlikaŭ cen na haz, ale jany da hetaha času nie ŭzhodnieny.
«Druhaja prablema — padatkovy manieŭr. Doŭha pra jaje ja kazać nie budu, tolki paznaču, što, na naš pohlad, heta parušeńnie dahavora ab Jeŭrazijskim ekanamičnym sajuzie. Takoha nie pavinna było adbycca, a kali adbyłosia, to varta było ŭličvać intaresy i biełaruskaj naftapierapracoŭki», — ličyć Siamaška.
Jašče adnym vostrym pytańniem, na jaho dumku, źjaŭlajecca «prasoŭvańnie miasa-małočnaj i inšaj charčovaj pradukcyi ź Biełarusi na rasijski rynak». «Čaćviortaje — ciažkaści z pastaŭkami našaj techniki ŭ Rasiju. Na žal, usie hetyja prablemy pakul što zastajucca niavyrašanymi», — skazaŭ dypłamat.
Pry hetym Siamaška padkreśliŭ, što Biełaruś zaŭsiody staviła dvuchbakovyja, u tym liku intehracyjnyja, adnosiny pamiž krainami «ŭ centr svajoj sacyjalna-ekanamičnaj palityki», bo Minsk vydatna ŭśviedamlaje značnaść adnosin z Rasijaj dla ekanomiki Biełarusi
«Ale ŭ toj ža čas nie prosim prefierencyj. My chočam roŭnych umoŭ dla subjektaŭ haspadarańnia. Mienavita ŭ hetym bačym asnoŭnuju metu intehracyi. Mienavita tak jaje razumiejem», — padsumavaŭ dypłamat.
