Hramadski transpart u stalicy pavinien być abnoŭleny. Pra heta zajaviŭ staršynia Minharvykankama Anatol Sivak, paviedamlaje BiełTA.
Hetaja vysnova zroblena nie tolki ŭ suviazi sa zvarotami kiroŭcaŭ šerahu tralejbusnych i aŭtobusnych parkaŭ Minska, zapeŭnivaje jon.
Anatol Sivak (sprava) padčas subotnika
«Jana zroblena ŭ pieršyja dni pracy na novaj pasadzie. My budziem aktyŭna abnaŭlacca. Raźličvajem zaviaršyć hetuju pracu ŭ 2019-2020 hadach. Heta, biezumoŭna, palepšyć umovy pracy ludziej, jakija pracujuć u tralejbusnych, aŭtobusnych i tramvajnych parkach», — adznačyŭ Anatol Sivak.
Pavodle jaho słoŭ, u hetym hodzie napiaredadni Jeŭrapiejskich hulniaŭ značna abnovicca ruchomy sastaŭ, ale praca ŭ hetym napramku budzie pradoŭžana. Naprykład, užo daručana zaklučyć kantrakt na pastaŭku partyi tralejbusaŭ.
«Ich nie abnaŭlali, pakolki ličyli, što tralejbus svajo zžyŭ. My pahladzieli tralejbusnyja linii — jany daloka nie znošanyja, tamu hety transpart budzie funkcyjanavać u miežach hetych linij», — rastłumačyŭ jon.
Na niekatorych maršrutach buduć zadziejničany tralejbusy z aŭtanomnym chodam, što dazvolić padoŭžyć ich ruch biez budaŭnictva novych linij.
Akramia taho, budzie abnoŭleny tramvaj. «I pa ekanamičnych pakazčykach, i pa ŭzroście jon dosyć prablemny. Da taho ž im niazručna karystacca, z-za vysokaj padłohi, naprykład», — dadaŭ Anatol Sivak.