Biełaruski kancern «Biełnaftachim» budzie patrabavać kampiensacyi ad rasijskaj «Transnafty» za pastaŭku niajakasnaj nafty. Pra heta zajaviŭ staršynia kancerna Andrej Rybakoŭ, pieradaje BiełTA.
«Usie mahčymyja nastupstvy buduć abmierkavany z «Transnaftaj» na budučaj naradzie. Biełaruski bok budzie nastojvać na vypracoŭcy kampiensacyjnych miechanizmaŭ», - skazaŭ Rybakoŭ. «Patrabujecca zamiaścić naftu jakasnym praduktam z adsutnaściu pieravyšeńnia dapuščalnaj kancentracyi pa chłorarhanicy. Nad hetym pracujem i čakajem infarmacyi ad rasijskaha boku», - adznačyŭ staršynia.
«U nas ź biełaruskim bokam zaklučany damovy na prapampoŭku nafty, dzie ahavorany u tym liku dziejańni bakoŭ u vypadku pieravyšeńnia normaŭ arhaničnych chłarydaŭ u nafcie. My budziem dziejničać u adpaviednaści z hetymi damovami», — skazaŭ RBK pradstaŭnik «Transnafty» Ihar Dziomin.
Pra toje, što z Rasii stała pastupać niajakasnaja nafta Urals, stała viadoma viečaram 19 krasavika. Pieršymi pra pastupleńnie niajakasnaj nafty paviedamiŭ Mazyrski naftapierapracoŭčy zavod, asobnyja proby pakazvali pieravyšeńnie ŭtrymańnia chłorarhaničnych złučeńniaŭ u sto razoŭ. Hetyja złučeńni mohuć sapsavać ciepłaabmiennaje abstalavańnie i katalizatarnyja sistemy, ich ramont moža zaniać ad paŭhoda i bolš, a škoda moža skłaści sotni miljonaŭ dalaraŭ, padkreśliŭ Rybakoŭ.
