U rasijskaj miedyjnaj prastory možna sustreć takuju hipotezu, što Alaksandr Łukašenka nieŭźlubiŭ rasijskaha pasła Michaiła Babiča praz toje, što toj jeździć pa rehijonach Biełarusi bolš aktyŭna za kiraŭnika krainy. Raźbiaromsia, ci heta śćvierdžańnie praŭdzivaje.
Za punkt adliku voźmiem datu 25 vieraśnia 2018 hoda. Mienavita ŭ hety dzień Michaił Babič uručyŭ davierčuju hramatu Alaksandru Łukašenku.
Supadzieńnie ci nie, ale ŭžo na nastupny dzień dypłamat nakiravaŭsia z pajezdkaj u Mahiloŭ, na radzimu Łukašenki. Tam Babič naviedaŭ «Chimvałakno», a taksama «OmskKarbon». U kancy pajezdki dypłamat uskłaŭ kvietki na Bujnickim poli.
Za hetyja siem miesiacaŭ Babič naviedaŭ usie abłasnyja centry, aproč Hrodna. Chacia ŭ samoj Hrodzienskaj vobłaści jon taksama byŭ: 11 kastryčnika pasoł pabyvaŭ na Astravieckaj AES, a taksama prajechaŭsia pa Smarhonskim i Ašmianskim rajonach. U pryvatnaści, jon byŭ na Smarhonskaj ptuškafabrycy i Ašmianskim syrarobčym zavodzie.
Čaściej za ŭsio Babič byvaŭ u Breście: ažno try razy (18 kastryčnika, 6 lutaha i 4 krasavika). Rasijski dypłamat pabyvaŭ na ŭsich značnych pradpryjemstvach horada: «Savuškaŭ», «Santa-Bremar», «Hiefiest», bačyŭsia sa staršynioj abłvykankama Anatolem Lisam, byŭ u Rasijskim centry navuki i kultury, prychodziŭ u Bresckuju jeparchiju. Taksama padčas vizitaŭ pa Brestčynie Babič naviedvaŭ «Pinskdreŭ» i Kobrynski muziej Suvorava.
Michaił Babič u centry padčas naviedvańnia Bresckaj vobłaści. Fota z sajta pasolstva Rasii ŭ Biełarusi.
Sa staršyniami abłvykankamaŭ Babič mieŭ spatkańni taksama ŭ Homieli i Viciebsku. Admietna, što ŭ kožnaj pajezdcy Babič abaviazkova starajecca sustrecca z carkoŭnym kiraŭnictvam (jepiskapami). Na pravasłaŭnaje Rastvo jon admysłova jeździŭ u Žyrovicki manastyr. Chadziŭ u Połacku u Spasa-Jeŭfrasińjeŭski manastyr. Taksama adznačym, što za hety čas Babiča dvojčy prymaŭ hanarovy Patryjaršy ekzarch Biełarusi Fiłaret, a jašče dvojčy — mitrapalit Minski i Zasłaŭski Pavieł.
12 śniežnia Babič byŭ na avijacyjnym ramontnym zavodzie ŭ Baranavičach. 12 sakavika — na BiełAZie ŭ Žodzina. Ahułam u Michaiła Babiča za hety pramiežak času atrymałasia 11 pajezdak pa krainie.
Ci sapraŭdy Łukašenka sastupaje tut rasijskamu pasłu? Nie. Za hety samyja pieryjad u Łukašenki nabrałasia 12 vyjezdaŭ za miežy Minska. Pryčym taksama jon pabyvaŭ va ŭsich abłaściach krainy.
Jak i Babič, najmienš uvahi Łukašenka nadaŭ Hrodna. Tam jon byŭ 19 kastryčnika i sustrakaŭsia sa studentami, a taksama vykładčykami miascovaha ŭniviersiteta.
Zatoje try razy kiraŭnik krainy naviedvaŭ Viciebskuju vobłaść. U abłasnym centry jon byŭ 2 listapada, kali pryjazdžaŭ na Viciebski futravy kambinat. A jašče dvojčy jaho ŭvaha była skiravanaja na Aršanski rajon. 4 listapada kiraŭnik krainy byŭ u byłym vajskovym haradku Bołbasava, a 30 listapada — na Aršanskim ilnozavodzie.
Ale dobra viadoma asablivaje staŭleńnie kiraŭnika dziaržavy da hetaha rehijona. Naprykład, letaś praź niedobraŭparadkavanaść u Aršanskim rajonie pasadaŭ pazbavilisia ministr pramysłovaści Vital Voŭk, a taksama ministr architektury i budaŭnictva Anatol Čorny.
Nie mienš trapiatkoje staŭleńnie ŭ Alaksandra Łukašenki da rodnaha Škłoŭskaha rajona. Tam jon byŭ 25-26 sakavika. I hetaja pajezdka nie skončyłasia biez kadravych rašeńniaŭ. Tak, paśla naviedvańnia haspadarki «Kupałaŭskaja» ŭ adstaŭku byŭ adpraŭleny staršynia Mahiloŭskaha abłvykankama Uładzimir Damanieŭski, pamočnik prezidenta Hienadź Łaŭrankoŭ, vice-premjer Michaił Rusy i ministr sielskaj haspadarki Leanid Zajac.
Dzie jašče byŭ Łukašenka? 5 kastryčnika jon pryjazdžaŭ na palihon u Ivacevickim rajonie, dzie znajomiŭsia z novaj technikaj biełaruskaha VPK. Byŭ u Homieli na forumie rehijonaŭ Biełarusi i Ukrainy, dzie sustrakaŭsia ź Piatrom Parašenkam. 22 sakavika pryjazdžaŭ u Baranavičy, kab spatkacca z aktyvam rajona. 6 listapada adkryvaŭ abnoŭleny most praz Prypiać u Žytkavickim rajonie. A jašče dvojčy vyjazdžaŭ u Łahojski rajon (na pasiaŭnuju i ŭ carkvu na Vialikdzień).
Hieahrafija naviedvańniaŭ jaŭna nie sastupaje Babiču. Lik 12:11 na karyść kiraŭnika Biełarusi.
