Hramadstva1212

«Addali 1700 jeŭra». Andrej Stryžak raskazaŭ, čamu jany z žonkaj pajechali naradžać u Litvu

U kancy krasavika homielski hramadski aktyvist Andrej Stryžak i jaho žonka Jaŭhienija stali baćkami. Heta dzicia dla pary — doŭhačakanaje. Paśla doŭhich biespaśpiachovych sprobaŭ jany vyrašyli adkładać hrošy na EKA. Na ščaście, pracedura nie spatrebiłasia. A sabranaj sumy chapała na toje, kab pajechać naradžać za miažu. Stryžaki vybrali Litvu. Jak pracuje miedycyna ŭ hetaj krainie, kolki kaštujuć pasłuhi i asobnyja pałaty, što ździviła ŭ padychodzie lekaraŭ i čamu partniorskija rody — heta całkam naturalna? Andrej Stryžak raskazaŭ pra dośvied ich siamji.

Kožnaj žančynie — asobnaja pałata

Čamu para nie razhladała špitali Biełarusi?

— Naradžać my chacieli ŭdvaich, znachodzicca razam ź dziciom — udvaich. Pryncypovym momantam taksama było abiazbolvańnie rodaŭ. U Homieli hetyja pasłuhi nam prapanavać nichto nie moh, — raskazvaje Andrej Stryžak.

Možna było b pajechać u Minsk, ale rody ŭ płatnych pałatach stalicy abyšlisia b niatanna. Plus Andreju daviałosia b zdymać žyllo. A ŭ Vilni była mahčymaść spynicca ŭ siabroŭ. Da taho ž Litva — heta jeŭrapiejskija miedycynskija pratakoły i standarty, z čałaviečym staŭleńniem da pacyjenta.

Špital vybrali dziaržaŭny: znajomyja siamji, jakija naradžali tam, kazali, što ŭzrovień absłuhoŭvańnia, abstalavańnia i lekaraŭ nie sastupaje pryvatnym klinikam. Zatoje košt nižejšy.

Pa padlikach Stryžakoŭ, za ŭsie pasłuhi i znachodžańnie ŭ miedustanovie jany addali 1700 jeŭra. U pryvatnych centrach ceny startujuć ad 3000 jeŭra.

— U Vilniuskim radzilnym domie jość dva paŭnavartasnyja madernizavanyja adździaleńni, ale z kožnym hodam zahružanaść usio mienšaja, i tamu na poŭnuju siłu pracuje tolki adno. Kožnaja paradzicha raźmiaščajecca ŭ asobnaj pałacie, abstalavanaj łožkam-transformieram z elektrapryvadam, vialikim humavym miačom dla ablahčeńnia schopak, aparatam pastajannaha manitorynhu sercabićcia i aparatam ŠVŁ dla dziciaci, kiuvietam z padahrevam dla novanarodžanaha, sistemaj padačy lekaŭ i rastvoraŭ z elektronnaj daziroŭkaj i kučaj usialakich inšych štuk, naznačeńnia jakich ja nie viedaju i jakija, na ščaście, nie spatrebilisia, — dzielicca Andrej.

Naziracca padčas ciažarnaści Jaŭhienija taksama jeździła ŭ Litvu. Asobny pryjom — dla tych, u kaho niama paśviedčańnia na prava žycharstva ŭ Litvie i miedstrachoŭki — kaštuje kala 10 jeŭra, ale bolš vyhadna stać na ŭlik i zapłacić adrazu za miesiac 27 jeŭra. Pry hetym možna chadzić i da biełaruskaha lekara. Pastanoŭka na ŭlik u Litvie asabliva karysna na poźnich terminach, kali možna ŭ luby momant pryjechać u radzilniu i pravieryć stan dziciaci ci chod ciažarnaści.

Što adčuvaje tata na rodach?

— Na rody ŭ Litvie pryjazdžajuć u dzień rodaŭ, kali schopki stanoviacca balučymi. Chutkuju ja bačyŭ usiaho niekalki razoŭ, u asnoŭnym dabirajucca svaim transpartam ci na taksi. Naprykład, my pryjechali ŭ piać viečara i naradzili a pałovie na dziasiatuju ranicy. Ahulny padychod — jak maha daŭžej znachodzicca doma ŭ naturalnym dla mamy i budučaha dziciaci asiarodku, dobra charčavacca i nabiracca sił dla sustrečy z małym, — dzielicca nazirańniami hramadski aktyvist.

Što cikava: u Litvie, kab prysutničać na rodach, mužčynu nie treba ni pisać zajavu, ni naviedvać kursaŭ, ni dadatkova płacić. Prosta prychodziš razam z žonkaj — i ŭsio. Andrej uspaminaje, što ŭsie paradzichi, jakich jon bačyŭ u kalidory, naradžali razam z partniorami.

Mužčyny ŭ adździaleńni byli nastolki ž naturalnaj źjavaj, jak lekar ci akušerka.

Na pytańnie, čamu vyrašyŭ znachodzicca ŭ taki intymny momant razam z žonkaj, Andrej žartuje: «Rabili razam i naradžać treba razam». I dadaje, što nie vieryć, byccam prysutnaść mužčyny na rodach moža pahoršyć stasunki ŭ pary. «Mnie padajecca, heta stereatyp z tych časoŭ, kali žančyna nie pavinna była kazać, što ŭ jaje miesiačnyja. Heta čałaviečy arhanizm, i toje, što ź im adbyvajecca, — naturalna. Prabačcie, dziaciej nie busieł prynosić, nie ŭ kapuście ich znachodziać».

Andrej pryznajecca: jon čałaviek z bahatym dośviedam roznych krytyčnych situacyj. Ale na rodach, stojačy ŭ bachiłach i pinžaku la łožka, adčuvaŭ usiu nierealnaść taho, što adbyvajecca.

— Litoŭskija miedyki anhažujuć baćku, jaki znachodzicca na rodach, — ty nie prosta siadziš na kresiełcy i hladziš, što adbyvajecca. Mianie pazvali da radzilnaha stała, dali zadańnie — trymać paduški i ciahnuć hałavu Ženi da hrudziej, kali iduć patuhi. Toje, što ty sam častkova prymaŭ rody, daje pačućcio spryčynieńnia — nie tak, što zdaŭ žonku ŭ špital i zabraŭ praz tydzień. Ty prachodziš usio ź joj ad pačatku da kanca.

Maleńkaha Stryžaka nazvali Albiertam. «Pa-pieršaje, heta imia ŭ jaho na tvary napisana, — z uśmieškaj tłumačyć tata. — A pa-druhoje, tak zvali dziadulu Ženi, Ejnštejna i jašče mnohich hodnych ludziej».

«Ciabie ŭsprymajuć jak čałavieka, a nie jak adzinku statystyki»

Toje, što pryjemna ździviła siamju, dyk heta staŭleńnie daktaroŭ. Pa słovach Andreja Stryžaka, u špitali ciabie ŭsprymajuć jak čałavieka, a nie jak adzinku statystyki.

Nichto nie kaža pra ciabie ŭ treciaj asobie, absalutna ŭsie manipulacyi i dziejańni nie tolki prahavorvajucca, ale i abmiarkoŭvajucca z taboj.

Lekary hatovy adkazać na pytańni, navat zadadzienyja pa niekalki razoŭ.

— Asobna varta skazać pra poŭnuju adsutnaść «sindromu vachciora» — uvieś miedpiersanał ad rehistratury da lekara z samaj pieršaj sustrečy nastrojeny dobrazyčliva i pazityŭna. Heta nie štučnaje «płatnaje» dobraje staŭleńnie, a miedycynski standart, pa jakim pracuje klinika, — zaŭvažaje surazmoŭca. — Na pieršaje miesca staviać mienavita baćkoŭ i budučaje dzicia.

U Biełarusi nie redkija situacyi, kali dźviery ŭ pałatu rasčyniajucca, uvachodzić hrupa studentaŭ-miedykaŭ i doktar na tabie, jak na trenažory, pačynaje štości pakazvać i raskazvać. Lažyš i adčuvaješ siabie paddoślednym trusam.

— Jakoje ž było majo ździŭleńnie, kali ja zaŭvažyŭ, što pry ŭvachodzie ŭ pałatu miedpiersanał stukaje ŭ dźviery i spraŭlajecca, ci ŭsio dobra. Kožny ad sanitarki da doktara naładžvaje kantakt, ale pry hetym nie pierachodzić miežy.

Paśla rodaŭ žančynu pieravodziać u dvuchmiesnuju pałatu — dla jaje i taho, chto supravadžaje. Tam ža znachodzicca i niemaŭla. U pałacie jość chaładzilnik, mikrachvaloŭka, elektryčny imbryk. Uklučana čatyrochrazovaje charčavańnie dla žančyny. Kaštuje ŭsio kala 30 jeŭra za sutki. Kali pakoj z asobnymi dušam i prybiralniaj, to na piać jeŭra daražej. Ale varyjantaŭ «luks» mienš, tamu jany zvyčajna zaniatyja.

— Pałata vyhladaje jak pakoj u sanatoryi, i sam režym znachodžańnia svabodny. Kali my pytalisia pra abmiežavańni, lekary padumali-padumali i skazali: nie dapuskajem prysutnaści svojskich žyvioł. Ujavicie biełaruski špital, u jakim by skazali, što adzinaje, što nielha — pryjści z sabakam, — uśmichajecca hramadski aktyvist.

Ź minusaŭ — maleńkamu Albiertu, u jakoha była infiekcyja, nie adrazu akazali naležnuju mieddapamohu.

«My trapili na katalicki Vialikdzień, i tamu atrymałasia, što niekalki dzion było prapuščana, možna było b chutčej zreahavać i pačać lačeńnie».

«U dekret pajdu ja»

U bolšaści krain Jeŭropy hramadzianstva dziciaci dajuć takoje ž, jak u baćkoŭ. Tamu Albierta zapisali biełarusam. Kab viarnucca ź niemaŭlom na radzimu, nieabchodna było atrymać u biełaruskim konsulstvie adpaviednaje paśviedčańnie. Pa słovach Andreja, usio ŭdałosia aformić chutka, bieź biurakratyčnaj zatrymki.

— Kali niejkich dakumientaŭ nie chapaje — pryniesiacie potym, fota dziciaci jakoje daście, takoje pastavim. Dakumienty ja padaŭ u čaćvier u abied — u piatnicu a 10 ranicy paśviedčańnie ŭžo było ŭ mianie na rukach, i my mahli jechać dadomu.

U adpačynak pa dohladzie dziciaci źbirajecca pajści Andrej. Kaža, choča prasoŭvać padychod, pry jakim tata aktyŭna ŭdzielničaje ŭ žyćci małoha.

Plus jamu, jak pravaabaroncu, cikava, jak heta pracuje, ci niama pieraškod pry afarmleńni «dekretu».

Ciapier hramadski aktyvist starajecca jak maha bolš času pravodzić z žonkaj i maleńkim synam — nie choča prapuścić pieršyja momanty z žyćcia dziciaci.

— Dla mianie naradžeńnie Albierta — heta abnaŭleńnie, pieražyvańnie svajho dziacinstva. I mahčymaść lehalna pahulać u mašynki, — žartuje Andrej Stryžak.

Kamientary12

 
Naciskańnie knopki «Dadać kamientar» aznačaje zhodu z rekamiendacyjami pa abmierkavańni.

Ciapier čytajuć

Studentka, jakaja ŭciakła ad aryštu ŭ 2020-m, pracuje na krajniaj poŭnačy Narviehii i zrazumieła skandynaŭski recept ščaścia20

Studentka, jakaja ŭciakła ad aryštu ŭ 2020-m, pracuje na krajniaj poŭnačy Narviehii i zrazumieła skandynaŭski recept ščaścia

Usie naviny →
Usie naviny

Zajcy ź vialikimi morkvami i čyrvona-zialony vietraź. U Smarhoni prajšoŭ konkurs «Płavańnie na čym papała» ŠMAT FOTA7

Nieviadomyja stvaryli fejkavy sajt Siarhieja Cichanoŭskaha i źbirajuć infarmacyju7

Praŭładnaj błohiercy Andžališy zrabili prapanovu ruki i serca ŭ Dzień Niezaležnaści13

Prajšli vobšuki ŭ byłoha ministra abarony Ukrainy Reźnikava4

Pravierka «BajChełpa» vyjaviła ŭciečku danych20

«Zastałasia tryvoha, jakaja nie adpuskaje navat nočču». Były palitviazień Siarhiej Šeleh prosić ab dapamozie7

U Zambii zvarjaciełaja słanicha zabiła dźviuch turystak3

Biełarus uziaŭ kredyt «Na rodnyja tavary», kab kupić matacykł «Minsk». Toj akazaŭsia kitajskim2

«My čakali Połk Kalinoŭskaha, kab vyzvaliŭ nas». Palitviazień patłumačyŭ, čamu paprasiŭ ab pamiłavańni20

bolš čytanych navin
bolš łajkanych navin

Studentka, jakaja ŭciakła ad aryštu ŭ 2020-m, pracuje na krajniaj poŭnačy Narviehii i zrazumieła skandynaŭski recept ščaścia20

Studentka, jakaja ŭciakła ad aryštu ŭ 2020-m, pracuje na krajniaj poŭnačy Narviehii i zrazumieła skandynaŭski recept ščaścia

Hałoŭnaje
Usie naviny →

Zaŭvaha:

 

 

 

 

Zakryć Paviedamić