Ilustracyjny skrynšot z sajta Blablacar.
Sud aštrafavaŭ žychara Pinskaha rajona na 127,5 rubla, ale paškadavaŭ i nie kanfiskavaŭ jaho mašyny.
U sud na pinčuka padali supracoŭniki padatkovaj inśpiekcyi. Jany vyjavili, što čałaviek raźmiaściŭ rekłamnuju abjavu na sajcie Blablacar.ru i pryniaŭ zamovu na pieravozku dvuch pasažyraŭ ź Pinska ŭ Rasiju. Damoviŭsia jon z «klijentami» na 2000 rasijskich rubloŭ z čałavieka — heta značyć, kala 65 biełaruskich rubloŭ, paviedamlaje pres-słužba Ekanamičnaha suda Bresckaj vobłaści.
Padatkaviki abvinavacili mužčyny ŭ ažyćciaŭleńni pradprymalnickaj dziejnaści biez rehistracyi ŭ jakaści indyvidualnaha pradprymalnika.
Mužčyna byŭ zarehistravany na sajcie Blablacar.ru. Pa źviestkach sajta, usiaho jon ažyćciaviŭ 80 pajezdak.
Sud pryjšoŭ da vysnovy, što takija dziejańni śviedčyli ab «nakiravanaści na sistematyčnaje atrymańnie prybytku ad pieravozki pasažyraŭ i źjaŭlalisia pradprymalnickaj dziejnaściu». Tamu sud nakłaŭ štraf pamieram 5 bazavych. Dadatkovaje administracyjnaje spahnańnie ŭ vyhladzie kanfiskacyi aŭtamabila nie ŭžyvałasia. Sud matyvavaŭ heta tym, što pravaparušalnik ŭpieršyniu pryciahvajecca da administracyjnaj adkaznaści, vinu ŭ ździajśnieńni pravaparušeńnia pryznaje.
Blablacar — heta internet-płatforma dla pošuku spadarožnikaŭ u pajezdki. Jaje stvaryli francuzy, ale jana dziejničaje ŭ 22 krainach, u tym liku Rasii i Ukrainie.
Nazva płatformu pachodzić ad rejtynhu, jaki vybirajuć sabie kiroŭcy: «Bla» dla maŭklivych, «BlaBla» dla siaredniehavarkich i «BlaBlaBla» dla tych, chto lubić patryndzieć. Kiroŭcy źmiaščajuć infarmacyju, kudy jeduć, i ŭkazvajuć, za kolki hatovyja padvieźci, ludzi vybirajuć sabie paputnych. Płatforma atrymlivaje 12% ad kožnaj uhody. Heta adzin z novych biznesaŭ, jaki daje mahčymaść ludziam u roznych krainach zarablać i ekanomić na pryncypach sharing.
U Biełarusi karystalnikaŭ Blablacar i anałahičnaha servisu Beepcar padatkaviki pačali ščamić z 2018 hoda, što niaredka vyklikaje abureńnie ludziej, bo havorka idzie pra zusim nievialikija sumy dachodaŭ.
