Apieratyŭna-analityčny centr hatovy patracić 700 tysiač biełaruskich rubloŭ na stvareńnie «Kompleksu raspaznańnia maŭlenčaj infarmacyi».
Na hetu zajmalnuju zakupku źviarnuŭ uvahu navukoviec i błohier Jahor Lebiadok u svaim telehram-kanale.
Pavodle techničnaha zadańnia, kompleks pryznačany dla pieratvareńnia akustyčnaj infarmacyi, što źmiaščaje pieramovy ad roznych dyktaraŭ na ruskaj movie i pastupaje ŭ vyhladzie hukavych fajłaŭ, u tekstavy vyhlad z metaj dalejšaj kłasifikacyi, adboru i analizu atrymanaj infarmacyi, pradastaŭleńnia apierataru-analityku stenahramy aŭdyjazapisu.
Sistema pavinna apracoŭvać nie mienš za 50 tysiač zapisaŭ za sutki, u časie heta nie mienš za 720 hadzin.
Jahor Lebiadok robić vysnovu, što techničnaje zadańnie vydaje sistemu dla prasłuchoŭvańnia i aŭtamatyčnaha pieravodu prasłuchanaha ŭ tekst.
«Apošni punkt [pra kolkaść zapisaŭ i hadzin — Red.], mahčyma, trochu raskryvaje i pieralik asobaŭ dla prasłuchoŭvańnia i analizu razmovaŭ. Aficyjna ŭtojvajecca, ale ŭ realnaści viadoma, što asnoŭnaja funkcyja AAC — heta kantrol viertykali ŭłady, a 50 tysiač razmovaŭ za sutki całkam dastatkova dla asnoŭnaj častki viertykali ŭłady ci inšych važnych dla dziaržavy asob. Chacia, viadoma, kompleks moža być vykarystany i ŭ dačynieńni da inšych hramadzian, abo na karyść inšych viedamstva», — piša Lebiadok.
Taksama admietna, što hetaja sistema nie ŭ stanie analizavać biełaruskuju movu.
Raspracoŭkaj sistemy zajmajecca Navukova-daśledčy instytut techničnaj abarony infarmacyi.
Čamu tak i dla jakich metaŭ stvarajecca kompleks, pakul nieviadoma. «Naša Niva» nakiravała ŭ AAC zapyt z adpaviednymi pytańniami.
