Kramloŭski prapahandyst Dźmitryj Kisialoŭ admaŭlaŭsia kampiensavać doŭh inžynieru pa rašeńni suda za budaŭnictva viły ŭ Kaktebieli. Pra heta inžynier Uładzimir Mazuryn raspavioŭ Novoj hazietie.
«Sam Kisialoŭ płacić doŭh admaŭlajecca. U nas niama inšaha sposabu atrymać tuju sumu, jakuju nam prysudzili. My padali zajavu sudovym prystavam i ŭ nahladny orhan. Kisialoŭ ža tak i kazaŭ, što rašeńnie suda nie abaviazkovaje dla vykanańnia. Ciapier my prosim padtrymku ŭ prakuratury, kab jany prasačyli vykanańnie rašeńnia suda», — paviedamiŭ Mazuryn.
Jon dadaŭ, što ciapier rychtujecca jašče adzin pazoŭ ab abaronie honaru i hodnaści. Mazuryn ličyć, što Kisialoŭ pavinien adkazać za tyja abvinavačvańni, jakija jon kazaŭ u efiry Rasii-1 i nazyvaŭ inžyniera ašukancam.
«Za toj brud, što havaryŭsia pra mianie, Kisialoŭ pavinien adkazać. Heta była nachabnaja padtasoŭka faktaŭ. Pry hetym heta było zroblena z asablivym cynizmam», — zajaviŭ Mazuryn.
Adnak paźniej Dźmitryj Kisialoŭ zajaviŭ radyjostancyi «Hovorit Moskva», što vypłacić Mazurynu 2,5 miljona rasijskich rubloŭ ($39 tysiač) pa rašeńni suda, choć i ličyć jaho ašukancam.
«Jon nie architektar, jon samazvaniec. Jon vyjhraŭ praces. Ja płaciŭ jamu hrošy, nie pisaŭ raśpisak. Jon vyrašyŭ atrymać jašče raz. Pa farmalnych pryncypach sud prysudziŭ jamu hetyja hrošy. Nu i ŭsio», — adznačyŭ teleprapahandyst.
Pa słovach Kisialova, takaja situacyja adbyłasia z-za jaho davierlivaści. «Kali budujecca niejki płot, prybudova, nu, chto heta robić u nas u Rasii? My ž u Rasii! Ja pa-rusku absalutna ź im raźličyŭsia, usio zapłaciŭ», — zapeŭniŭ jon.
Televiadučy ŭdakładniŭ, što nie budzie asprečvać rašeńnie, bo nie žadaje marnavać na heta svoj čas.
