30 červienia praciŭniki akumulatarnaha zavoda znoŭ sabralisia na tradycyjnaje karmleńnie hałuboŭ, paviedamlaje Tut.by.
U pikavy momant na centralnaj haradskoj płoščy Lenina prysutničała zvyš 200 čałaviek, paviedamiŭ pravaabaronca Raman Kiślak. Ludzi abmiarkoŭvali apošnija naviny, źviazanyja z akumulatarnym zavodam. U pryvatnaści, inicyjatyvu ŭrada stvaryć pracoŭnuju hrupu, jakaja naviedaje anałahičnyja vytvorčaści ŭ susiednich krainach.
— Zvyčajna kania napieradzie kalos staviać, a nie naadvarot. My heta prapanoŭvali jašče ŭ lutym. Kazali: vaźmicie vopyt inšych krain, praviercie, pahladzicie, što tam. Nam zajaŭlali, što ŭsio budzie dobra, — prakamientavaŭ uradavuju inicyjatyvu adzin ź lidaraŭ pratestu Dźmitryj Biekaluk.
Druhoj temaj dla abmierkavańnia stała zatrymańnie suzasnavalnika akumulatarnaha zavoda ŭ Breście Viktara Lemiašeŭskaha. Na dumku jašče adnaho lidara pratestu Dziamjana Lepiasieviča, heta nie supakoić ludziej:
— Moža, heta prosta vykrutas? Zatrymali, raspaviali, kab narod supakoić. Heta taksama varyjant. Viery im niama. […] Kali Lemiašeŭski dakładna siadzie ŭ turmu i dakładna vyviezuć z hetaha zavoda abstalavańnie, tady ja asabista skažu, što ŭłada zrabiła ŭsio pavodle zakonu.
Kala 12.45 prysutnyja prajšli kałonaj pa centralnych vulicach horada pa maršrucie: vulica Puškinskaja — vulica Savieckaja.
