Pryzy festu «Magnificat»

11 červienia ŭ Hłybokim zavieršyŭsia II Mižnarodny katalicki festyval chryścijanskich filmaŭ i tieleprahram «Magnificat-2006».

Jak i letaś, Hran-pry było vyrašana nie prysudžać. Karcina Haliny Adamovič «Zaviadzionka», jakaja vyhladała na favaryta, atrymała tolki ŭchvalny dyplom za vysoki prafesijny ŭzrovień.

Najlepšym dakumentalnym filmam pryznanaja stužka českich aŭtaraŭ «Uhanda, pakutnaja perlina Afryki». Film Leaša Ryški raspaviadaje pra krainu, jakuju raździraje hramadzianskaja vajna. Buntaŭniki z «Haspodniej armii vyzvaleńnia» kraduć dziaciej — i vučać ich zabivać. A misijanery apiekujucca ŭciekačami i dapamahajuć viarnucca dzieciam da narmalnaha žyćcia.

Karcina była zasłonienaja ŭračystaściami pieršaha dnia — i tamu jaje vyłučeńnie vyhladaje na dziva.

Pryz katalickaj asacyjacyi dla kamunikacyj «Signis-Belarus» atrymała stužka Michaiła Jakžena «Rodnaja duša» infarmacyjnaha ahienctva Biełaruskaj Pravasłaŭnaj Carkvy. Karcina raspaviadaje pra ihumiena Nikana, «mučanika za Chrystovuju vieru».

Ajcy franciškanie ŭpadabali film Mikałaja Kniazieva «Sierafimavy braty», jakaja pakazvaje žyćcio praavasłaŭnych manachaŭ. Stužku Biełaruskaha videacentru adznačyli «za jaskravaje ŭvasablenanie vobrazu Śviatara — nastaŭnika, lekara čałaviečych duš».

Braterskaha festi «Niepakalanaŭ» zacikaviła karcina Ŭładzimiera Bokuna «Siamja Skrobat». Vypusk z telecyklu «Los čałavieka» havoryć pra cudoŭnyja padziei ŭ siamji, źviazanyja z vyratavanaj statujaj Dzievy Maryi.

A Hłybockamu rajvykankamu spadabaŭsia prosty biełaruski film Volhi Marokavaj i Maksima Michalcova «Pałońniki schilnaściaŭ» — na aktualnuju temu baraćby z narkamanijaj i ałkahalizmam.

Rasiejskaja stužka na tuju ž temu «Ja sustreŭ Boha ŭ ciemry» adznačanaja hildyjaj kinakrytyki Biełaruskaha sajuza kinematahrafistaŭ «za cełasnaść źmiastoŭnaha i vobraznaha vyrašeńnia sacyjalnaj tematyki».

A čorna-bieły łatyski dyjament Inesy Klavy «Paśla słova «Amen» paznačany admysłovym pryzam žury. Režyserka sutykaje teatralna-ateistyčnuju industryju pachavalnych kantoraŭ — i cichaje słova pastara.

Siarod teleprahramaŭ stužka «Boh dziejničaje praź ludziej» Darji Jurkievič była pa-za kankurencyjaj. Hety vypusk teleprahramy «Isnaść» pakazvaje adzin dzień z žyćcia ksiandza Juzafa Bulki. Trapnyja nazirańni, udałyja detali i daśviedčany mantaž maładoj režyserki (jana šče vučycca ŭ Akademii mastactvaŭ) vyłučajuć stužku nia tolki na ahulnym tle biełaruskaje televizii — ale j robiać jaje hodnaj na mižnarodnym feście — pobač ź inšymi pieradačami.

Film Darji Jurkievič byŭ adznačany hałoŭnym pryzam za lepšuju teleprahramu — i, badaj, tolki z hetym pryzam nie było intryhi.

Usiaho ŭ feście pryniali ŭdzieł 28 filmaŭ z 8 krainaŭ.

Naleta hledačy ŭbačać novyja niečakanki.

Andrej Rasinski

• 0
• 0
• 0
• 0
• 0
• 0
• 0
• 0