Ihar Kamaroŭski — deputat Pałaty pradstaŭnikoŭ, člen tak zvanaj «Partyi pracy i spraviadlivaści».
Pa infarmacyi telehram-kanała «Piataja kałonka», Kamaroŭski byŭ siarod tych niekalkich deputataŭ, jakija nie padtrymali novaŭviadzieńni ŭ zakon ab adterminoŭkach ad słužby ŭ vojsku. Zakon pryniali 28 červienia: ciapier adterminoŭka dajecca tolki adzin raz.
«Naša Niva» źviazałasia z Kamaroŭskim, kab udakładnić, ci sapraŭdy jon nie padtrymaŭ zakonaprajekt.
Ihar Kamaroŭski. Fota — «Minski kurjer»
«U hałasavańni ja ŭstrymaŭsia: heta ž ani «za», ani «suprać», vy ž razumiejecie.
Ja nie suprać zakona, ja suprać miechanizmaŭ, jakimi jon budzie realizavany, — paviedamiŭ Ihar Kamaroŭski. —
Hety zakon tyčycca kožnaha hramadzianina. Absalutna kožnaha, nie tolki pryzyŭnika, bo ŭ kožnaha jość mama, babula, a časam užo navat i žonka.
A zakon ža publična nie abmiarkoŭvaŭsia. Pačynać treba z hetaha: z hramadskaha abmierkavańnia. A jaho nie było. Tamu ŭ hetym jość niejkaja adnabokaść, na maju dumku».
Na dumku Kamaroŭskaha, mianiać treba ŭ pieršuju čarhu padychod da samoha zakona.
«Zakon nie musić tolki zapałochvać, zabaraniać i pahražać. Zakon musić pryciahvać, pavyšać prestyž našaha vojska, kab tudy sapraŭdy chacieli iści. Kab my nie razhladali pytańni ŭchileńnia ad słužby», — rastłumačyŭ Kamaroŭski.
Na jaho dumku, pavysić prestyž vojska moža zalik słužby ŭ strachavy staž, naprykład.
«U ŚMI było šmat vielmi pravilnych prapanoŭ. Naprykład, ab abaviazkovym dziaržaŭnym strachavańni žyćcia i zdaroŭja sałdat terminovaj słužby. Kab pracoŭnaje miesca faktyčna zastavałasia zamacavanym za tym, kaho pryzyvajuć. A siońnia heta daloka nie paŭsiul i nie ŭsie heta zabiaśpiečvajuć, davajcie kazać ščyra, — skazaŭ deputat. — Heta tolki niekalki varyjantaŭ. Z zakonaprajektam treba było pracavać bolš detalna i padrabiazna, a jaho pryniali davoli apieratyŭna.
Pierachod na kantraktnuju słužbu byŭ by idealnym varyjantam.
Ale vy ž viedajecie pazicyju Minabarony, čamu my suprać pierachodu? Ja tak razumieju, prablema ŭ biudžetnych vydatkach, heta pa-pieršaje. I, pa-druhoje, pastajanna spasyłajucca na niejkuju mižnarodnuju praktyku. Nibyta jość niejkija niehatyŭnyja momanty ŭ arhanizacyi słužby i vykonvańnia zadač kantraktnikami».
Sam Kamaroŭski ŭ vojsku nie słužyŭ.
«Kali ja vučyŭsia, to ŭ mianie była vajskovaja kafiedra. Ale ja da hetaha staŭlusia spakojna. Daviałosia b słužyć — adsłužyŭ by. Antahanizmu da vojska ja nie adčuvaju anijakaha, heta nie niejkaje tam pryncypovaje pytańnie.
Prosta chaciełasia b, kab i ŭ hetym zakonaprajekcie my myślili inšymi katehoryjami, a nie tymi sastarełymi i archaičnymi», — skazaŭ Kamaroŭski.
