Navukovy supracoŭnik Nacyjanalnaj akademii navuk Taćciana Majsiejeva raskazała BiełTA pra sioletni ŭradžaj hryboŭ i jahad u Biełarusi.
«Krasavik, maj i červień byli zasušlivymi amal pa ŭsioj krainie, tempieratura pavietra pierasiahała klimatyčnuju normu. Usio heta, viadoma, akazała svoj upłyŭ na ŭradžaj hryboŭ i jahad. Hryby źjavilisia ŭ kancy krasavika — pačatku maja, asabliva pa poŭdni Biełarusi, ale chutka prapali z-za takoha anamalnaha nadvorja. Kali my ŭ siaredzinie červienia składali prahnozy dla Minpryrody, u Bresckaj, Hrodzienskaj, Minskaj i Viciebskaj abłaściach pa ŭsich vidach resursaŭtvaralnych hryboŭ (bieły hryb, lisička zvyčajnaja, padbiarozavik, padasinavik i apieńka asieńniaja) prahnozy byli siarednija, a ŭ Homielskaj i Mahiloŭskaj — nižej za siaredni. Lipień, jaki ličycca samym haračym letnim miesiacam, taksama nie paradavaŭ nadvorjem: davoli chaładnavata, časta iduć daždžy. Z adnaho boku, možna skazać, što dla hryboŭ heta dobra, ale z druhoha — mnohija ź ich, naprykład lisički, ryžyki, lubiać ciapło i nie lubiać praźmiernuju vilhać. Dla ich najbolš spryjalnaje ciopłaje nadvorje i kali doždž imžyć», — skazała Taćciana Majsiejeva.
Jana adznačyła, što hrybny pik u Biełarusi zvyčajna prypadaje na žnivień-vierasień.
«Heta samyja hrybnyja miesiacy, tamu što da letnich hryboŭ dabaŭlajucca asiennija. Jakoha ŭradžaju hryboŭ nam čakać u žniŭni-vieraśni — budzie zaležać ad nadvorja ŭ bližejšyja tydni. Kali praz tydzień-druhi ŭstalujecca ciapło, to i pojduć hryby - tyja ž maślaki, syraježki, biełyja hryby, padbiarozaviki, padasinaviki, machaviki. A ŭžo bližej da vieraśnia da ich dałučacca padhruzdki, radoŭki, hruzdy, apieńki», — adznačyła vučony.
Zasucha paŭpłyvała i na ŭradžaj jahad, asabliva pa poŭdni Biełarusi.
«Čarnicy ŭ hetym hodzie drobnyja, ich mała. Uradžaj žuravin pa Bresckaj, Homielskaj i Viciebskaj abłaściach siaredni, pa astatnich rehijonach — nižejšy za siaredni. Bruśnicy i bujaki ŭ lasach nie vielmi časta sustrakajucca, asabliva pa poŭdni Biełarusi. U Homielskaj vobłaści bruśnicy ź lasoŭ naohuł źnikajuć z-za takich anamalnych tempieratur vyšejšych za klimatyčnuju normu. Navat kali ćvicieńnie bruśnic i bujakoŭ vielmi bahataje, uradžaj byvaje nižejšy za siaredni i nizki. U bruśnic u mocnuju haračyniu časta apadaje zaviaź, u vyniku, kali jany k žniŭniu paśpiavajuć, jahad zastajecca mała. U hetych adnosinach najbolš spryjalnyja ŭmovy ŭ Viciebskaj vobłaści: kali niama zamarazkaŭ poźniaj viasnoj i rańniaj vosieńniu, usie jahadniki dajuć dobry ŭradžaj», — źviarnuła ŭvahu Taćciana Majsiejeva.
Pavodle danych Biełhidramieta, krasavik 2019 hoda ŭ Biełarusi byŭ samym suchim za apošnija 75 hadoŭ. U siarednim pa Biełarusi vypała 7 mm apadkaŭ, što składaje 18,2 pracenta klimatyčnaj normy. Siaredniaja tempieratura pavietra pa Biełarusi ŭ krasaviku była na 1,5 hradusa vyšej za normu — taki vysoki pakazčyk adznačajecca prykładna adzin raz u 10 hadoŭ. U mai tempieratura była ŭ asnoŭnym na 1-2 hradusy vyšej za normu. Daždžy byli pieravažna karotkačasovymi, niedabor apadkaŭ u mai adznačaŭsia ŭ asobnych rajonach pa paŭdniovym uschodzie i paŭnočnym zachadzie krainy. Siaredniaja pa Biełarusi tempieratura pavietra za červień pierasiahnuła klimatyčnuju normu na 4,6 hradusa. U pieršy letni miesiac adznačaŭsia niedabor apadkaŭ — 55 pracentaŭ klimatyčnaj normy, u vyniku čaho na rekach krainy naziraŭsia ŭ asnoŭnym spad uzroŭniaŭ vady. Pry hetym niachvatka vilhaci adznačałasia va ŭsich troch dekadach červienia — vypała 29 pracentaŭ, 42 pracenty i 89 pracentaŭ klimatyčnaj normy adpaviedna. U lipieni ž ustalavałasia chaładnavataje daždžlivaje nadvorje z tempieraturaj pavietra nižejšaj za klimatyčnuju normu.
