Praktyčnaja adpracoŭka avaryjnych płanaŭ Biełaruskaj AES zapłanavana ŭ kastryčniku 2019 hoda, paviedamlaje BiełTA.
Źniešni płan (achoŭnyja mierapryjemstvy pry radyjacyjnaj avaryi na AES) zaćvierdžany ŭ sakaviku 2018 hoda, unutrany płan (mierapryjemstvy pa abaronie piersanału ŭ vypadku avaryi na AES) — u mai 2018-ha. Pa inicyjatyvie Biełarusi na zaviaršalnym etapie raspracoŭki źniešniaha avaryjnaha płana prajekt dakumienta byŭ vyvučany ekśpiertami MAHATE i atrymaŭ stanoŭčuju adznaku.
Siarod pryjarytetnych zadač siońnia — zaviaršeńnie pracesu licenzavańnia ekspłuatacyi enierhabłoka №1 Biełaruskaj AES, zavoz jadziernaha paliva na placoŭku atamnaj stancyi, raźvićcio mietadałohii i praktyki nahladnaj dziejnaści, u tym liku padrychtoŭku da nahladu za uvodam u ekspłuatacyju i ekspłuatacyjaj AES, raźvićcio dziaržaŭnaj sistemy pa papiaredžańni nadzvyčajnych situacyj z ulikam budaŭnictva atamnaj stancyi.
Biełaruskaja AES z dvuma reaktarami VVER-1200 sumarnaj mahutnaściu 2400 MVt budujecca pa rasijskim prajekcie kala Astraŭca (Hrodzienskaja vobłaść). Pieršy enierhabłok płanujecca ŭvieści ŭ ekspłuatacyju ŭ kancy 2019 hoda, druhi - u 2020-m.
