Siońnia ranicaj u Maładziečnie pasažyrski ciahnik naśmierć źbiŭ 14-hadovaha chłopčyka na čyhunačnym pierachodzie.
Trahiedyja adbyłasia a 10-j hadzinie. Chłopčyk pierajazdžaŭ čyhunačnyja šlachi na rovary pa piešachodnym naścile. Jon prapuściŭ štadler, ale nie zaŭvažyŭ nabližeńnie ciahnika «Hrodna — Minsk». Padletak byŭ u słuchaŭkach i trapiŭ pad ciahnik, ad atrymanych traŭmaŭ jon pamior na miescy.
Vyśvietliłasia, što tak trahična abarvałasia žyćcio 14-hadovaha vychavanca dziciača-junackaj škoły «Maładziečna 2018» Andreja Mickieviča.
U pieršynstvie Biełarusi siarod junakoŭ 2005 hoda naradžeńnia Andrej vystupaŭ za kamandu z rodnaha horada. Pra padrabiaznaści zdareńnia Hockey.by raspavioŭ trenier DIUSŠ «Maładziečna-2018» Alaksandr Hrakovič.
«Dzicia jechała ranicaj na treniroŭku, a 10 hadzinie ŭ ich byŭ śniadanak. Pierajazdžaŭ na rovary ŭ słuchaŭkach čyhunačny pierajezd, trapiŭ pad ciahnik. Niezrazumieła, jak usio heta adbyłosia — tam miesca takoje, što ŭ dva baki ŭsio prahladajecca, ludzi machali, kryčali … Vialikaje hora. Treniroŭki voś tolki-tolki ŭ nas pačalisia, litaralna tydzień pracuju z hetaj kamandaj. Andrej — fizična dužy, dobry chłopiec, vydatna hulaŭ u abaronie. Chodzim ciapier usio, ruki trasucca, nie razumiejem, jak takoje mahło zdarycca» … — raspavioŭ trenier.
Viačerni matč «Dynama» z «Brestam», start jakoha namiečany na 19:00, pačniecca z chviliny maŭčańnia.