Mižnarodny valutny fond najchutčej što prypynić vypłatu čarhovaj tranšy stabilizacyjnaha kredytu Ŭkrainie. Urad Cimašenki hatovy ŭ takim vypadku pajści na zbližeńnie z Maskvoj uzamien za 5‑miljardny kredyt.
Adpaviednuju prośbu Julija Cimašenku ŭžo nakiravała rasijskamu ŭradu. Jaje krok vyklikaŭ rezkuju krytyku z boku prezidenta Viktara Juščanki.
Ukraina nie vykonvaje ŭmovy kredytnaha pahadnieńnia, zaklučanaha z MVF, i maje mała šancaŭ atrymać nastupnuju tranšu, paviedamlajuć ŚMI sa spasyłkaj na krynicy ŭ delehacyi Fondu ŭ Kijevie. Havorka ab pryniaćci ŭradam nierealistyčnaha biudžetu na 2009 hod, jaki pryviadzie da hihanckaha biudžetnaha deficytu.
Ukraina, zaležnaja ad popytu na mietał i ŭhnajeńni na suśvietnym rynku, najciažej pieražyvaje ekanamičny kryzis.Situacyja paharšajecca praź biaskoncyja sprečki miž finansavymi hrupoŭkami i palityčnymi siłami, jakija ich reprezientujuć. Kab utrymacca na krai prorvy, Kijeŭ pajšoŭ z šapkaj. Letaś jamu ŭdałosia damovicca pra vydzialeńnie 16,4 młrd kredytu ad MVF. Adnak i hetych hrošaj niestaje. Tamu Cimašenka raspačała pieramovy ŭ Maskvie ab vydzialeńni $5 młrd na pakryćcio biudžetnaha deficytu.
Delehacyja vypraviłasia ŭ Rasiju tajemna, ale infarmacyju ab pieramovach vyviedali žurnalisty.
Premjer‑ministarka Ukrainy Julija Cimašenka ŭ svaje apraŭdańnie paviedamiła, što Ŭkraina źviarnułasia pa dapamohu adnačasova da ZŠA, ES, Kitaju i Japonii i što «pra svaju hatoŭnaść padpisać kredytnaje pahadnieńnie zajaviła Rasija». Cimašenka nie moža nie viedać, što zachodnija krainy, jak praviła, nie dapamahajuć finansava naŭprost. Ekanamičnaja dapamoha — sprava mižnarodnych finansavych instytutaŭ, takich jak Valutny fond ci Suśvietny bank. Miž tym Maskva achvotna vyłučaje dziaržaŭnyja pazyki ŭzamien za palityčnyja pasłuhi. 2 młrd atrymała za apošnija paŭhodu Biełaruś, jašče bolš paabiacana Kirhizii za zakryćcio amierykanskaj bazy «Manas», 0,5 młrd vydzielena malesieńkaj Armienii.
Na dumku Juščanki, pieramovy z Maskvoj — «heta niebiaśpiečnaja palityka, jakaja stvaraje pahrozu nacyjanalnym intaresam Ukrainy».
Pieršuju tranšu kredytu MVF pamieram $4,5 młrd Ukraina atrymała ŭ listapadzie, atrymańnie nastupnych było pastaŭlena ŭ zaležnaść ad skaračeńnia deficytu biudžetu.
