Žychar Šviecyi pazbyŭsia ruki paśla napadu krakadziła, jaki kaliści naležaŭ savieckamu kasmanaŭtu Uładzimiru Šatałavu. Pra heta paviedamlaje lenta.ru sa spasyłkaj na Associated Press.
Lekary pa łokać amputavali ruku 79-hadovaha Łarsa Lidehrena. Jon atrymaŭ traŭmu na pryvatnaj viečarynie ŭ stakholmskim akvaryumie «Skansen», kali apuściŭ ruku ŭ valjer z kubinskimi krakadziłami. Adna z reptylij schapiła jaho za ruku i kala dziesiaci siekund trymała jaje ŭ paščy. Švied try tydni pravioŭ u balnicy.
U valjery, na jaki zalez piensijanier, žyła para redkich krakadziłaŭ z Kuby.
U 1977 hodzie Fidel Kastra padaryŭ ich savieckamu kasmanaŭtu Uładzimiru Šatałavu. Tady reptylii byli zusim maleńkimi - mienš za 50 santymietraŭ u daŭžyniu. «Jon advioz ich u Maskvu i trymaŭ u siabie ŭ kvatery, pakul žonka nie skazała: «Dosyć!»» - raspaviadaŭ dyrektar akvaryuma «Skansen» Junas Valstrom.
Šatałaŭ addaŭ krakadziłaŭ Maskoŭskamu zaaparku, adnak z-za ramontu im nie znajšłosia tam miesca. Tady ich prapanavali stakholmskamu «Skansenu».
U 1981 hodu Valstrom asabista advioz paru mietrovych reptylij ŭ Šviecyju. Pavodle jaho słoŭ, jany lacieli zvyčajnym pasažyrskim rejsam «Aerafłotu». «Ja pranios ich jak ručnuju pakłažu, - śćviardžaŭ dyrektar akvaryuma. - Tady heta było prosta. U Savieckim Sajuzie ŭ abmien na roznakalarovyja paštoŭki i aŭtaručki možna było damahčysia čaho zaŭhodna».
Kubinskija krakadziły sustrakajucca tolki ŭ bałocie Sapata na Kubie i na vostravie Chuvientud. Jany adroźnivajucca ad inšych krakadziłaŭ jarkaj afarboŭkaj i doŭhimi muskulistymi łapami. Jak praviła, pradstaŭniki hetaha vidu vyrastajuć da 2,3 mietra ŭ daŭžyniu i važać kala 40 kiłahramaŭ. Pa roznych acenkach, u śviecie zastałosia ad troch da šaści tysiač asobin.
