U pieryjad kaladnych śviatkavańniaŭ pradstaŭniki Tavarystva biełaruskaj škoły ładzili haściavyja rejdy ŭ minskija škoły i sadki, u jakich viadziecca navučańnie i vychavańnie na biełaruskaj movie. Asnoŭnaja meta ich — maralnaja padtrymka piedahohaŭ u ich nialohkaj spravie, kaladnyja vinšavańni, hanaravańnie dypłomami TBŠ za prafiesijnaje majsterstva i vychavańnie nacyjanalnaj śviadomaści budučych aktyŭnych hramadzian niezaležnaj Biełarusi, uručeńnie nievialikich padarunkaŭ.
Da farmavańnia padarunkaŭ dałučylisia roznyja hramadskija arhanizacyi.
Centr «Supolnaść» padaravaŭ škołam šmatlikija mietadyčnyja dapamožniki, litaraturu pa hramadzianskaj adukacyi, a taksama zapisaŭ admysłovy DVD dysk «Hadujem biełarusaŭ», u jaki ŭvajšli scenary dziciačych śviataŭ, hulni, mietadyčnyja materyjały pa krajaznaŭstvie i etnaškole, piesieńki dla maleńkich, aŭdyjoknihi, kazki, čytanki, multfilmy, mastackija filmy i šmat čaho karysnaha dla nastaŭnickaj pracy.
Hramadskaje abjadnańnie «Zhurtavańnie biełarusaŭ śvietu «Baćkaŭščyna» prezientavała nastaŭnikam histaryčnyja knihi.
Abjadnańnie baćkoŭ ź Biełastoččyny «AB‑BA» padaravała kožnaj škole biełaruskuju azbuku — kalarovy nabor litar ałfavitu, jaki stvaryła vydatnaja biełaruskaja nastaŭnica ź Biełastoku Alina Vaŭraniuk.
Biełaruskaja škołka ŭ Ńju‑Jorku i kulturna‑adukacyjnaja fundacyja Orsa‑Ramana dapamahli sfarmavać dla kožnaha biełaruskaha sadočka nabory dyskaŭ i kasietaŭ z multfilmami, kazkami, piesieńkami, a nastaŭnikam jany pieradali knihi biełaruskich kłasikaŭ: Janki Kupały, Vasila Bykava, Niła Hileviča i inšych.
A kampanija «Budźma!» dapamahła azdobić padarunki admysłovymi torbačkami, vinšavalnymi paštoŭkami. Ad imia TBŠ piedahohaŭ vinšavali Aleś Łozka, staršynia, i Tamara Mackievič, namieśnik staršyni hramadskaha abjadnańnia.
Niahledziačy na pieradkaladnyja turboty, a taksama biaskoncyja reformy, pravierki, biurakratyčnyja patrabavańni, školnyja i daškolnyja ŭstanovy z zadavalnieńniem vitali haściej z padarunkami i vinšavańniami. U siaredniaj škole h.Minsku, №60 (K.Libchnieta, 82), dzie arhanizavana navučańnie pa‑biełarusku va ŭsich kłasach, haściej viesialiŭ tradycyjnymi pieśniami kaladny hurt školnikaŭ z «zorkaj» i «kazoj». Padarunki i dypłomy TBŠ atrymali nastaŭniki historyi Ludmiła Kryłovič i Aksana Chachłova, jakija šmat namahańniaŭ nadajuć krajaznaŭčaj pracy.
Plonnaja razmova adbyłasia ŭ staličnaj himnazii №14 (Vaśniacova, 10), dzie sioleta ŭ čatyroch pieršych biełaruskich kłasach navučajecca 84 vučni (darečy, padobny vialiki nabor adbyŭsia jašče tolki ŭ himnazii №4).
Darečy, u himnazii №14 pracuje znakamitaja nastaŭnica chimii Teresa Ivanaŭna Miatlickaja, jakaja sioleta pa vynikach usich vyprabavańniaŭ stała pieramožcaj konkursu prafiesijnaha majsterstva «Staličny nastaŭnik — staličnaj adukacyi» ŭ naminacyi «Nastaŭnik».
Hanaravańni ad TBŠ atrymali Maryja Harochava, namieśnik dyrektara, Dźmitryj Rovienski, kiraŭnik uzornaha falkłornaha ansamblu «Dudaryki», Śviatłana Sobal, zahadčyk biblijateki, Natalla Šurdziakova, kiraŭnik mietadyčnaha abjadnańnia nastaŭnikaŭ biełaruskaj movy i litaratury.
U himnazii №23, što raźmiaściłasia na praśpiekcie Niezaležnaści, byli hanaravanyja razam z dyrektaram Ninaj Nikicinaj u asnoŭnym vykładčyki, jakija raźvivajuć u dziaciej mastackija zdolnaści (śpievy, tancy, vycinanka i h.d.). Heta Alena Tumiłovič, Viktoryja Bielčanka, Natalla Hamajunava, Iryna Monina. Ale nastaŭnicki kalektyŭ himnazii unikalny. Tut pracujuć vydatnyja fiłołahi, linhvisty, jakija vykładajuć šviedskuju, kitajskuju, polskuju dy anhlijskuju movy pa‑biełarusku.
U himnazii №9 h. Minska hanaravańnie adbyłosia padčas piedahahičnaj narady, na jakoj prysutničali ŭsie nastaŭniki. Dypłomy atrymali fiłołahi Maryna Jančeŭskaja, Inesa Andryjanava, a taksama dyrektarka — Łarysa Apalinskaja.
Sioleta minskaj SŠ №2 nadadzieny status himnazii (№28). Usie kłasy tut majuć biełaruskuju movu navučańnia, himnazija śpiecyjalizujecca na vyvučeńni zamiežnych movaŭ. Vialikaja zasłuha ŭ hetym, biezumoŭna, byłoha dyrektara Alaksandra Siadziaki — namieśnika staršyni TBŠ, vydatnaha vykładčyka fiziki, jaki za svaje piedahahičnyja, linhvistyčnyja talenty i hramadzianskuju pracu atrymaŭ ad uradu Francyi orden Akademičnych palmaŭ. TBŠ uznaharodziła vykładčykaŭ himnazii № 28 Taćcianu Kurakievič (pačatkovyja kłasy), Volhu Hryškievič, Natallu Štaniuk i Natallu Dabravolskuju (biełaruskaja mova).
U himnazii №4, jakoj kiruje pieramožca konkursu TBŠ, łaŭreat zvańnia «Biełaruski nastaŭnik 2007 hodu» Jury Bandarenka, sioleta adznačana praca vykładčykaŭ Aleny Kałtovič (biełaruskaja mova), Uładzimira Dziemidoviča (historyja), Kaciaryny Bohdan (pačatkovyja kłasy), Iryny Dziemidovič (anhlijskaja mova), a taksama namieśnikaŭ dyrektara Natalli Juškievič i Haliny Filipionak.
Dziciačym sadkam №187, dzie hadujucca 4 hrupy biełaruskamoŭnych dzietak, i №534, što maje až 12 biełaruskich hrup, vielmi pašancavała z zahadčykami. Heta adčuvajecca adrazu, kali ŭvachodziš u daškolnyja ŭstanovy. Kiraŭniki ich — Taciana Jurčyk i Łarysa Urulova — atrymali dypłomy TBŠ nie zdarma. Pra takich kažuć, što jany addajuć pracy ŭsiu dušu. Zahadčyki zdoleli nie tolki znajści najlepšych vychavacielaŭ dla dzietak, zrabić muziei, znajści sučasnaje abstalavańnie, hulniovyja srodki, navat zrabić žyvy kutočak z chamiačkom i čarapaškami, ale i pasialić biełaruski duch u svaje sadočki. Darečy, samaja vialikaja ŭ respublicy biełaruskaja DDU №534 raźmieščana ŭ adnym mikrarajonie z samaj vialikaj rodnamoŭnaj himnazijaj №4. A voś z padobnym susiedstvam sadku №187 nie pašancavała, niama pobač biełaruskaj škołki. Škada, što kiraŭnictva Savieckaha RAA nie vałodaje stanoŭčym piedahahičnym dośviedam u hetaj spravie. Kab vyrašyć prablemu, nie patrebna šukać dziaciej u adzin biełaruskamoŭny pieršy kłas ruskaj ustanovy ŭ niespryjalny pieryjad nacyjanalnaha zabvieńnia, a zrabić rašeńnie — prymać tolki ŭ pieršyja kłasy ź biełaruskaj movaj navučańnia choć adnoj u SŠ rajonu.
Dypłomami TBŠ taksama byli ŭznaharodžanyja Natalla Aniščuk, Łarysa Babrova, Maryna Sałaviej (vychavacieli DDU №187), Śviatłana Kuprejčyk, Halina Hryhorjeva, Aksana Škredava, Halina Kiškurna, Śviatłana Zanimon (vychavacieli DDU №534), Iryna Jurkievič, (zahadčyk DDU №202) i vychavacieli Natalla Rak i Taciana Tarłoŭskaja. Jašče dva hady tamu nazad i sad №202 ličyŭsia poŭnaściu biełaruskim, a ciapier tut užo tolki dźvie hrupy, a naahuł u stalicy kaliś było 170 biełaruskamoŭnych hrup…
Sa zvalnieńniem z pasady sapraŭdnaha lidera ŭstanovy pastupova zabyvajecca słava raniej pryznanych centraŭ biełaruskaści — DDU №367 (eks‑zahadčyca Halina Pryma), №314 (eks‑zahadčyca Raisa Ślasarčyk) i inš.
Pośpiechaŭ i nadalej vam, sapraŭdnyja Nastaŭniki, niepachisnaj viery ŭ śvietłuju budučyniu Biełarusi.
Kalektyŭ sadka №202 trymajecca rodnaj movy.
Himnazija №23 - fłhaman biełaruskamoŭnaha navučańnia. Na fota - namieśnica dyrektarki Halina Połudzień.
