Inśpiektary znajšli kiroŭcu «Chondy», jaki ŭ Minsku žorstka padrezaŭ aŭtamabil DAI. Na parušalnika skłali dva pratakoły, paviedamiła Tut.by aficyjny pradstaŭnik MUS Volha Čamadanava
Nahadajem, usio adbyłosia na staličnaj vulicy Lenina. Kiroŭca «Chondy» jechaŭ u krajniaj levaj pałasie i, miarkujučy pa ŭsim, źbiraŭsia paviarnuć naleva na praśpiekt Niezaležnaści. Kali strełka ŭ dadatkovaj siekcyi pahasła, jon uklučyŭ inšy pavarotnik, vyruliŭ naprava, čamuści vyjechaŭšy ŭ pieršuju pałasu, pa jakoj ruchaŭsia słužbovy aŭtamabil z bartavym numaram 533 (DAI Hrodna), i praciahnuŭ ruch prama.
Kiroŭcam «Chondy» apynuŭsia student adnaho sa staličnych VNU sa stažam kiravańnia mienš za hod. Z pačatku 2019 hoda jon šeść razoŭ pryciahvaŭsia da administracyjnaj adkaznaści za parušeńni PDR. Pavodle jaho słoŭ, pry pierastrojvańni jon straciŭ kiravańnie i častkova zajechaŭ u pieršuju pałasu, paśla čaho vyraŭnavaŭ aŭtamabil i praciahnuŭ ruch.
U dačynieńni da parušalnika inśpiektary skłali dva administracyjnyja pratakoły: pa č. 6 art. 18.14 (Nievykanańnie patrabavańniaŭ raźmietki) i č. 10 art. 18.14 (Stvareńnie avaryjnaj abstanoŭki) KoAP Biełarusi. Za pieršaje parušeńnie praduhledžany štraf ad 1 da 5 BV, za druhoje - štraf ad 5 da 20 BV z pazbaŭleńniem pravoŭ na 2 hady abo biez pazbaŭleńnia.
