U najbujniejšaha dziaržaŭnaha pieravozčyka dva hady vykradali infarmacyju. Sprava dajšła da suda

Adzin na ŭciokach, druhi na łavie padsudnych, treci pad «asabistym paručalnictvam». U Partyzanskim sudzie Miensku pačałasia hučnaja sprava ab kradziažy zakrytych źviestak z kamputarnaj bazy dadzienych «Biełmytservisa» — dziaržaŭnaj arhanizacyi, jakaja dapamahaje ŭ mytnym afarmleńni hruzaŭ. Maŭlaŭ, skradzienymi źviestkami karystalisia kankurenty na rynku mytnaha afarmleńnia, piša Radyjo Svaboda.

Za što jašče sudziać?

Siarhiej Suravicki (jon na łavie padsudnych) i Kanstancin Maroz (prychodzić u sud sam) — supracoŭniki arhanizacyi «Manalitpraminviest». U spravie fihurujuć taksama inšyja kampanii z hrupy, u jakuju ŭvachodzić hetaja firma. Siarhiej Suravicki pracavaŭ u firmie admysłoŭcam pa kamputarnaj biaśpiecy, a Kanstancin Maroz dahetul pracuje namieśnikam dyrektara i adkazvaje za kamputarnuju biaśpieku.

Abodvum padsudnym vystaŭlenaje abvinavačańnie pa 4 artykułach Kryminalnaha kodeksu. Heta

• niesankcyjanavany dostup da kamputarnaj infarmacyi (art. 349-2),
• niezakonnaje zavałodańnie kamputarnaj infarmacyjaj (art. 352),
• raspracoŭka ci vykarystoŭvańnie škodnaj virusnaj prahramy (354-2) i
• kamercyjny špijanaž (254-2).

Im pahražaje da 10 hadoŭ.

U spravie fihurujuć źviestki i pra treciaha fihuranta, Dźmitryja Dašuka, aryštavanaha va Ŭkrainie letaś u kastryčniku na zapyt biełaruskich pravaachaoŭnych orhanaŭ Sprava Dašuka vyłučanaja ŭ asobnuju vytvorčaść. Dašuk u 2018 hodzie źbieh z krainy, jon abvieščany ŭ mižnarodny vyšuk. Pavodle śledztva, bolšaść złačynnych epizodaŭ spravy prachodziła ź jahonym udziełam.

Taksama ŭ spravie fihuruje litoŭskaja firma «Bonasta», jakaja zajmajecca biznesam, źviazanym z mytnym afarmleńniem hruzaŭ na litoŭskim baku miažy. U hetaj litoŭskaj firmy i biełaruskich firmaŭ, jakija fihurujuć u jakaści zacikaŭlenych u «złačynnaj» infarmacyi, jość ahulny suzasnavalnik. Nibyta ŭ ich intaresach i dziejničali abvinavačanyja.

Straty aceńvajucca ŭ sumu bolš jak 600 tysiač rubloŭ

Jak pranikali ŭ bazu dadzienych «Biełmytservisa»?

Pavodle śledztva, Siarhiej Suravicki, jaki raniej pracavaŭ u «Biełmytservisie», skarystaŭ svaje viedy pra systemu infarmacyjnaj biaśpieki hetaj arhanizacyi dla praniknieńnia ŭ jaje bazu dadzienych. Nibyta dziela hetaha navat vykarystoŭvaŭ admysłovy virus.

Prakuratura ličyć, što z 2015 da 2017 hodu hetak krałasia infarmacyja prynamsi čatyroch kamercyjnych firmaŭ, jakaja znachodziłasia ŭ bazie dadzienych «Biełmytservisa».

Najpierš cikaviła namenklatura tavaraŭ, źviestki pra mytnyja płaciažy dy inšaja infarmacyja, jakaja ličycca kamercyjnaj tajnaj. Pavodle śledztva, Suravicki rabiŭ heta sumiesna z Kanstancinam Marozam, Dašukom i jašče adnoj nieŭstanoŭlenaj asobaj. Skradzienyja źviestki vykarystoŭvalisia «dziela atrymańnia dadatkovaha prybytku».

Jak miarkuje abvinavačańnie, złačynnaja dziejnaść Suravickaha i Maroza naniesła firmam, jakija stali achviarami kradziažu ich zakrytych dadzienych, straty ŭ 618 tysiač rubloŭ, aŭtarytet «Biełmytservisa» «byŭ padarvany».

Ci pryznali vinu padsudnyja?

Siarhiej Suravicki nie pryznaŭ viny ŭ kamercyjnym špijanažy i taho, što karystaŭsia ŭ złačynnych metach škodnym virusam. Ale pryznaŭ siabie vinavatym pa inšych dvuch artykułach. Kanstancin Maroz taksama pryznaje vinu tolki častkova.

Na pačatku pracesu advakat Suravickaha chadajničaŭ ab źmienie jamu miery strymańnia. Kamputarščyka trymajuć pad vartaj užo bolš za paŭtara hoda, choć jon nijak nia moža paŭpłyvać na zbor dokazaŭ, davodziŭ abaronca. Ale sud pakinuŭ Siarhieja Suravickaha na čas pracesu pad vartaj.

• 0
• 0
• 0
• 0
• 0
• 0
• 0
• 0