Ludziej upieršyniu ŭnieśli ŭ śpis «darmajedaŭ» i jany ŭbačyli astranamičnyja žyroŭki. Ale ŭsio nie tak prosta
Čytačy «Našaj Nivy» ź Minska dasłali ŭ Redakcyju niekalki dziŭnych kvitancyj ab kvartpłacie za vierasień.
Sumy ŭražvajuć — 273 rubli ŭ adnaho čałavieka, 220 rubloŭ u inšaha. Kvatery — dvuchpakajovyja.
U abodvuch majomaść zarehistravanaja na svajakoŭ, jakija pa biełaruskich zakonach stali ličycca «darmajedami».
My prahladzieli žyroŭki, kab razabracca, adkul vyleźli takija šalonyja ličby.
Akazałasia, što sprava ŭ «ekanamična abhruntavanym taryfie» na padahreŭ vady, jaki składaje 88,99 rubloŭ za Hkał zamiest byłych 18,48 rubloŭ — roźnica amal u piać razoŭ!
U raźlikovych centrach kažuć, što tolki ŭ stalicy ci nie tysiačy ludziej atrymali žyroŭki z novymi sumami.
Ale, akazvajecca, usio nie tak prosta.
Sprava ŭ tym, što kamisii, jakija vyznačajuć «darmajedaŭ», unosiać u svaje śpisy ludziej pastupova, pa miery «identyfikacyi», tamu, možna dumać, što ŭ zhadanych vypadkach ludzi ŭrazilisia novymi taryfami, tamu što ŭbačyli ich upieršyniu.
A jak patłumačyli «Našaj Nivie» u Ministerstvie pracy, na heta moža być nakładziena jašče adna situacyja.
«My razabralisia prynamsi z adnoj situacyjaj: u kvatery była źvierka pakazańniaŭ pryboraŭ uliku vady. Vadakanał vyśvietliŭ, što ŭ hetaj kvatery nie dapłačvali za vadu — płacili mienš, čym realna spažyvali. Z ulikam źvierki vady i taho, što pražyvaje niezaniaty płacielščyk kamunalnych pasłuh, byŭ zrobleny pieraraźlik pa pavialičanym taryfie», — skazali u viedamstvie.
Kolki takich kvater u stalicy, nieviadoma.
Kamientary