U Taebła (Estonija) na terytoryi miascovaj himnazii raźmieščana brackaja mahiła, u jakoj pachavanyja jak minimum 25 savieckich sałdat. Niekalki hadoŭ tamu tam navat adnavili pomnik. Ciapier pomnik źnieśli, a pa mahile jeździć ciažkaja technika, tam pačałosia maštabnaje budaŭnictva, paviedamlaje Postimees.
Kiraŭnik adździeła pa suviaziach z hramadskaściu Departamienta achovy pomnikaŭ daŭniny Madle Lipus adkazała, što pareštki zahinuŭšych u Taebła pierapachavany. Pracy prajšli ŭ lipieni 2019 hoda.
Lipus paviedamiła, što pareštki byli pachavany na Maarduskich mohiłkach.
Pamočnica kiraŭnika Estonskaha vajennaha muzieja Chielen Kruuśviee skazała, što dla pierapachavańnia pareštak zahinułych u Druhoj suśvietnaj vajnie ŭ muziej źviarnułasia Laane-Nihułaskaja vałasnaja ŭprava: «Mahiła akazałasia ŭ rajonie zapłanavanaha budaŭnictva novaj taebłaskaj škoły, i jaje raźmiaščeńnie nie dazvalała zachavać hodnaje abychodžańnie ź joj». Pavodle jaje słoŭ, mahiła raźmiaščałasia pierad budynkam škoły, pobač z futbolnym stadyjonam: «Pa prajekcie budaŭnictva novaha školnaha budynka i spartyŭnaj placoŭki, brackaja mahiła akazvałasia na terytoryi zapłanavanaha kala škoły stadyjona».
Jana ŭdakładniła, što chutčej za ŭsio miesca pachavańnia ŭźnikła na hetym miescy praz paru hadoŭ paśla zakančeńnia vajny, kali sabrali prach z roznych mahił: «Na pamiatnym kamiani byli ŭkazany try imieni i 23 nieviadomyja sałdaty. Ale padčas ekshumacyi było vyjaŭlena tolki siem trunaŭ, u jakich byli astanki 11 čałaviek — heta savieckija sałdaty, ale ich asoby vyśvietlić niemahčyma».
