Pa Šabanoŭskaj akruzie №91 Minska zarehistravana było piaciora kandydataŭ. Pradstaŭnik ŁDPB sam źniaŭsia z vybaraŭ. Zastałosia čaćviora, ale na debaty pryjšli ŭsiaho dvoje
— heta pradstaŭnica ŭładnaj viertykali, dyrektarka minskaha filijału Biełaruskaha handlova-ekanamičnaha ŭniviersiteta spažyvieckaj kaapieracyi Halina Łahunova, a taksama pradstaŭnik Respublikanskaj partyi, inžynier Minskaha matornaha zavoda Mikałaj Šybieka. Čamuści pradstaŭnik Abjadnanaj hramadzianskaj partyi, pa akruzie Juryj Adamovič u debatach udzielničać nie zachacieŭ.
Łahunova havaryła na šykoŭnaj trasiancy: «cierytoryja», «iźbieracieli», «suviereniciet». «Ad nas zaležyć budučynia Biełarusi, i toje, što my pakiniem našym naščadkam», — kazała jana kazionnyja vyrazy va ŭstupie.
Vystup Šybieki, jon pradstaŭlaje dastatkova marhinalnuju Respublikanskuju partyju, jakuju ažyvili niekalki eks-aktyvistaŭ «Havary praŭdu», byŭ dosyć rezkim. Jon adrazu staŭ napadać na Łahunovu:
«Ci hatovyja vy adstojvać naš suvierenitet u źviazku ź intehracyjnymi prajektami? Upeŭnieny, što nie. Ci hatovyja vy kazać «nie» pavyšeńnia ŭzrostu vychadu na piensiju? Upeŭnieny, vy nie budziecie adstojvać hetaje pytańnie. Ci hatovyja vy da mahčymych źmien Kanstytucyi dziaržavy? Ja ŭpeŭnieny, što nie. Ci hatovy vy skazać «nie» antynarodnym zakonaprajektam, jak zakon ab adterminoŭkach? Upeŭnieny, vy nie hatovyja. Vy budziecie maŭčać, jak i papiarednija sklikańni parłamienta», — kazaŭ Šybieka.
«Ja budu abaraniać narodnaje mierkavańnie, zmahacca z antynarodnymi zakonami», — pafasna kazaŭ kandydat.
Kali Łahunovaj prapanavali adkazać na zakidy Šybieki, to jana sama pierajšła ŭ nastup.
«Rejtynh vašaj palityčnaj partyi 0,7%. Stratehija partyi razmytaja. Što vy možacie skazać da 60 tysiač vybarcaŭ našaj akruhi? Adzinaje, što vy zrabili — praviali akcyju ŭ padtrymku tradycyjnaj siamji», — u hety momant Łahunova stała demanstravać fotazdymki toj akcyi. «A heta ž usiaho dva praloty płota», — skazała jana.
Šybieka pačaŭ u nastup adnosna sistemy adukacyi. «Adukacyja tak i nie stała važnaj kaštoŭnaściu ŭ hramadstvie. Nastaŭniki biahuć, deficyt vykładčyckaha składu, vy zdradzili adukacyi va ŭhodu Minabarony. Navošta tady vy idziacie ŭ parłamient?»
Na heta Łahunova stała kazać, što ŭ jaje 33 hady piedahahičnaha stažu. I jana vychavała cełaje pakaleńnie, jakoje ciapier «paśpiachova padymaje našu krainu». «U majoj navučalnaj ustanovie stabilny kalektyŭ», — skazała kandydatka.
Pryjšła i Łahunova z «chatnimi narychtoŭkami». Maŭlaŭ, vy, spadar Šybieka, nie viedziacie ahitacyju, niama pikietaŭ, ale źbirajecie Ukantakcie hrošy na kampaniju. «Moža, usio dziela hrošaj?» — napaŭrytaryčna pytajecca jana.
«U vas administracyjny resurs!» — pačaŭ kryčać Šybieka. «Niama nijakaha resursu», — adkazvała pradstaŭnica ŭłady. «Pierad majoj ulotkaj ludzi spyniacca, a na vašu navat nie hlanuć», — emacyjna kazaŭ Šybieka. U hety momant jon vypadkova navat pabiŭ šklanku z vadoj.
«Mikałaj, vy «kanapavy aktyvist» i viedziacie svaju dziejnaść tolki ŭ internecie. Čaho vy dasiahnuli jašče?» — pravakavała Łahunova. Potym jana stała pytacca, što kandydat zrabiŭ dla azielanieńnia Minska. Na heta Šybieka nie zmoh ničoha adkazać. «Tolki słovy, i nijakich kankretnych dziejańniaŭ, ja tak i viedała», — zaznačyła dyrektarka.
«Vybar vidavočny — Łahunova», — zaklikała žančyna praz debaty. U kancy jana skazała, što budzie dabivacca budaŭnictva škoły 210, a taksama piešachodnych darožak.
