Dźmitryj Kościn ŭ siniaj kofcie. Fota: Natalla Bienicevič, TUT.BY
U sudzie siońnia niešmatludna. Niekalki čałaviek pryjšli padtrymać Uładzimira Kościna. Jon siadzić u kletcy, ad kamier žurnalistaŭ nie advaročvajecca. Eks-dyrektar departamienta mocna schudnieŭ i asunuŭsia.
Ludzi, jakija pryjšli jaho padtrymać, ad kamientaroŭ i jakich-niebudź razmoŭ admaŭlajucca. Adna z žančyn chryścić kletku, u jakoj siadziać dvoje abvinavačanych. Druhi — Viktar Voŭčanka, inžynier-inśpiektar pa avijacyjnaj biaśpiecy i biaśpiecy palotaŭ TAA «Avijastar». Pa viersii śledstva, mienavita jon daŭ chabar Kościnu. Jon advaročvajecca ad žurnalistaŭ i navat padčas abviaščeńnia vynikovaj častki prysudu staić u kletcy bokam.
Jašče adzin abvinavačany — Andrej Nieściaruk, kamandzir pavietranaha sudna. Jon znachodzicca ŭ zale na pieršaj łavie. Jaho abvinavačvajuć pa č.6 art 16 KK u saŭdziele ŭ złačynstvie i pa č. 1 art. 380 KK u padrobcy, vyrabie, vykarystańni albo zbycie padroblenych dakumientaŭ, štampaŭ, piačatak, błankaŭ.
Sud Centralnaha rajona Minska pryznaŭ Uładzimira Kościna vinavatym pa č. 3 art. 430 KK (atrymańnie chabaru) i č.3 art 426 KK (pieravyšeńnie ŭłady i słužbovych paŭnamoctvaŭ) da 9 hadoŭ pazbaŭleńnia voli ŭ kałonii ŭzmocnienaha režymu. Jamu taksama zabaroniena na praciahu 5 hadoŭ zajmać pasady, źviazanyja z vykanańniem arhanizacyjna-rasparadčych abaviazkaŭ.
U dachod dziaržavy pastanavili spahnać vartasny ekvivalent nabytaj vyhady — u sumie krychu bolš za 211 tysiač rubloŭ.
Viktara Voŭčanku pryznali vinavatym pa č. 2 art. 431 KK (dača chabaru) i prysudzili da 2 hadoŭ pazbaŭleńnia voli ŭ kałonii ŭzmocnienaha režymu. Jamu taksama nielha na praciahu 5 hadoŭ zajmać pasady, źviazanyja z vykanańniem arhanizacyjna-rasparadčych abaviazkaŭ.
Andreja Nieściaruka pryznali vinavatym pa č.6 art. 16 KK i č. 1 i č. 2 art. 380 KK i dali štraf u 200 bazavych vieličyń — heta 5100 rubloŭ. Mieru strymańnia ŭ vyhladzie padpiski ab niavyjeździe i naležnych pavodzinach jamu pakinuli bieź źmien da ŭstupleńnia prysudu ŭ zakonnuju siłu.
Prysud nie ŭstupiŭ u zakonnuju siłu i moža być abskardžany i apratestavany na praciahu 10 sutak.
Z kletki Uładzimir Kościn adkazaŭ žurnalistam, što abskardžvać jaho nie budzie.
Nahadajem, Uładzimira Kościna zatrymali razam z chabaradavalnikam 20 sakavika 2018 hoda. Abodva fihuranty byli źmieščany ŭ SIZA KDB. Infarmacyja tady była karotkaj: dyrektara Departamienta pa avijacyi Ministerstva transpartu i kamunikacyj Uładzimira Kościna zatrymali na miescy złačynstva pry atrymańni chabaru ŭ 3500 dalaraŭ. U dačynieńni da jaho raspačali kryminalnuju spravu pa č. 3 art. 430 (Atrymańnie chabaru paŭtorna, albo šlacham vymahalnictva, albo ŭ bujnym pamiery). Jak paźniej raspaviali TUT.BY — heta nie pieršy chabar.
— Kościn sistematyčna atrymlivaŭ chabar za vyrašeńnie pytańniaŭ, jakija ŭvachodziać u jaho kampietencyju, — paviedamiła naša krynica.
Bolš nijakich padrabiaznaściaŭ rasśledavańnia kryminalnaj spravy nie paviedamlałasia, TUT.BY dvojčy nakiroŭvaŭ aficyjny zapyt u Viarchoŭny sud z prośbaj pradastavić infarmacyju, ci pryznačanaja data sudovaha razboru pa spravie Kościna. Adkazy byli anałahičnymi — hetaj spravy ŭ vytvorčaści suda niama.
Uładzimir Kościn — piłot 1 kłasa, ahulny nalot — bolš za 10 tysiač hadzin. Raniej ŚMI paviedamlali, što bolšaja častka lotnaj karjery Kościna pryjšłasia na pieraloty VIP-pasažyraŭ. Jon taksama byŭ piłotam borta № 1.
