Zdareńnie adbyłosia ŭ minułuju piatnicu ŭ Hrodnie. 69-hadovaja žančyna pajšła ŭ handlovy centr. Jana naviazała sabaku la ŭvachodu ŭ budynak, a kali praz paŭhadziny vyjšła, to ŭbačyła, što sabaki niama, paviedamlaje abłasnaja milicyja.
Žančyna adrazu źviarnułasia ŭ milicyju, ale praź niekalki hadzin sabaka znajšoŭsia. Vyśvietliłasia, što jaho zabraŭ 49-hadovy mužčyna. Pravaachoŭniki pa kamierach videanazirańnia vyśvietlili, što mužčyna vyjšaŭ z terytoryi adnoj z budaŭničych arhanizacyj, padyšoŭ da łaŭki, dzie była pryviazanaja taksa. Kala 15 chvilin siadzieŭ pobač, hładziŭ jaje, a potym zabraŭ.
Mužčyna rastłumačyŭ, što znachodziŭsia ŭ stanie ałkaholnaha apjanieńnia i vielmi lubić sabak jašče z maładości, kali słužyŭ na karabli. Jamu zdałosia, što taksa zamierzła, choć taja była ŭ kambiniezonie. U vyniku mužčyna advioŭ vykradzienaha hadavanca ŭ budaŭničuju bytoŭku, dzie adpuściŭ z łancužka, a sam praciahnuŭ vypivać.
Ale jon zabyŭsia začynić dźviery, i sabaka źbieh. Mała taho, žyvioła dobra viedała rajon i samastojna viarnułasia dadomu. A supracoŭniki kryminalnaha vyšuku znajšli ŭ bytoŭcy ŭ padazravanaha kambiniezon i pavadok.
Ciapier sabaka ŭžo doma. Haspadynia padziakavała milicyi za toje, što apieratyŭna razabralisia ŭ situacyi. Što da mužčyny, to kryminalnaja adkaznaść za padobnyja dziejańni praduhledžana pa artykule «Kradziež».