Aŭtamabil ź placoŭki kanfiskatu? Čamu b i nie, kali košt i stan prydatnyja, a dziaržava daje harantyju, što nijakich abciažarańniaŭ pa aŭtamabili niama — jaho možna svabodna kuplać i pradavać, vyjazdžać za miažu. Tak dumaŭ minčuk Mikita (imia źmieniena), pakul nie sutyknuŭsia z samym sapraŭdnym machlarstvam byłoha ŭłaśnika kanfiskavanaha aŭto i ledź nie pazbaviŭsia ułasnaści, piša tut.by.
— U žniŭni 2014 hoda ja kupiŭ u aŭtakanfiskacie darahi aŭtamabil. Kaštavaŭ jon bolš za 20 tysiač dołaraŭ. Mašyna była ŭ dobrym stanie.
U Biełarusi aŭtamabil byŭ kanfiskavany za parušeńnie terminaŭ znachodžańnia ŭ režymie časovaha ŭvozu. Uładalnik, hramadzianin zamiežnaj dziaržavy, nie paśpieŭ vyvieźci svajo aŭto nazad. Sud pastanaviŭ aŭtamabil kanfiskavać u dachod dziaržavy.
— U aŭtamabila było paru niuansaŭ, na jakija ja tady nie źviarnuŭ uvahi. Adsutničaŭ techpašpart i adzin rehistracyjny znak. Kluč taksama byŭ tolki adzin. Tym nie mienš, zhodna z dakumientami, jakija ja atrymaŭ ad kramy, aŭtamabil pastavili na ŭlik. Ja atrymaŭ numary i spakojna jeździŭ amal piać hadoŭ. Niekalki razoŭ vyjazdžaŭ na svaim aŭto za miažu, nikoli nijakich prablem nie ŭźnikała.
U krasaviku minułaha hoda Mikita padaŭ abjavu ab prodažy mašyny. Z rehistracyi mašynu nie zdymaŭ, bo źbiraŭsia zrabić heta razam z pakupnikom, zaklučyŭšy ŭ DAI dahavor kupli-prodažu.
— U DAI my zaklučyli damovu z pakupnikom, ja zdaŭ numary i techpašpart, i my stajali ŭ čarzie atrymlivać tranzitnyja numary. Čakać treba było hadziny dźvie. Pakupnik pieradaŭ mnie hrošy, a ja jamu — klučy ad aŭtamabila. Kab nie hublać čas, pakupnik prapanavaŭ mnie prakacicca da najbližejšaj zapraŭki, a zaadno bolš padrabiazna raspavieści ab aŭtamabili.
Kali my viarnulisia nazad, mianie čakaŭ «siurpryz». Śledčy kamitet, apierhrupa: «Mašyna ŭ vyšuku Interpała, ty zhonščyk!»
Mikita sprabavaŭ rastłumačyć, što ŭžo piać hadoŭ vałodaje aŭtamabilem i ni pra jaki kradziež nie moža być i havorki. Zrazumiełaja sprava, što nie mienš ahałomšanamu pakupniku Mikita viarnuŭ hrošy.
— Paśla ŭsich razhladaŭ aŭtamabil u mianie ŭsio ž kanfiskavali. Ale voś što cikava. Kali vyklikali evakuatar dla dastaŭki mašyny na štrafstajanku, DAI admoviłasia zabirać mašynu, tamu što ŭ ich pa bazie Interpała jana nie ličycca skradzienaj. Kažuć: u nas niama padstaŭ zabirać mašynu. Śledčyja kryčać: u nas jość rapart, jana skradzienaja. U vyniku ja sam na svajoj mašynie pajechaŭ na štrafstajanku, tamu što DAI tak i nie ŭziałasia jaje evakuiravać.
Śledstva doŭžyłasia da lipienia. Vyśvietliłasia, što aŭtamabil byŭ nabyty zakonna, tamu była vyniesiena pastanova ab admovie ŭ zaviadzieńni kryminalnaj spravy. Zdavałasia b, usio ŭ paradku, śledstva razabrałasia, što nijakaha kradziažu nie było. Jak by nie tak.
— U kastryčniku Nacyjanalnaje centralnaje biuro Interpała Biełarusi paviedamlaje mianie, što moj aŭtamabil ličycca ŭ vyšuku pa ŭlikach vykradzienaha aŭtamotatranspartu bazy dadzienych Hienieralnaha sakrataryjata Interpała pa inicyjatyvie pravaachoŭnych orhanaŭ Litoŭskaj Respubliki. I voś tut pačynajecca druhi etap majoj epapiei. Ja zakidvaju skarhami ŭsie mahčymyja dziaržaŭnyja orhany, uklučajučy Hienieralnuju prakuraturu. Na jakoj padstavie ŭ mianie adbirajuć aŭtamabil, jaki byŭ zakonna nabyty? Čamu paśla pravierki Centralnym RUUS Minska infarmacyja ab tym, što moj aŭtamabil nie znachodzicca va ŭhonie i nie źjaŭlajecca schoplenym, nie była nakiravana ŭ Interpał Litoŭskaj Respubliki i inšyja ŭpaŭnavažanyja orhany?
Mikita padklučyŭ advakata i pačaŭ bambavać listami dziaržaŭnyja orhany Litoŭskaj Respubliki. Pa słovach Mikity, litoŭski bok na listy ŭvohule nie reahavaŭ. Paciarpieły pisaŭ u Hienieralnuju prakuraturu Litvy i ŭ departamient palicyi.
— Ja patrabavaŭ ad dziaržaŭnych orhanaŭ raspačać u dačynieńni da byłoha ŭłaśnika kryminalnuju spravu pa fakcie machlarstva, ale mnie ŭsiudy adkazvali admovaj.
U MZS paraili, kab ja sam źviartaŭsia da litoŭskich uładaŭ. Ja pabyvaŭ na pryjomie ŭ namieśnika hienieralnaha prakurora, tam mianie krychu supakoili. Skazali, što prakuratura horada rychtuje materyjały dla kryminalnaj spravy pa fakcie machlarstva. Pavodle ich infarmacyi, heta nie adzin taki vypadak. Praŭda, da hetaha času ja nie viedaju, na jakoj stadyi znachodzicca hetaja sprava.
U rešcie rešt naporystaść Mikity dała svoj plon. Jaho pačuli. Litoŭski bok dasłaŭ pastanovu ab vydaleńni mašyny z bazy skradzienych aŭto Interpała. Vyšuk spynieny. Mašynu možna było znoŭ spakojna zdymać z uliku i pradavać.
— Tym nie mienš były ŭłaśnik, jaki prakruciŭ hetuju schiemu, zastajecca biespakaranym. Jon nie źjaŭlajecca hramadzianinam Biełarusi, tamu našy orhany rajać mnie źviartacca z zajavaj u litoŭskija pravaachoŭnyja orhany. Kab prosta dakazać svaju nievinavataść u hetaj, zdavałasia b, prostaj situacyi, mnie pryjšłosia vydatkavać płojmu hrošaj, času i niervaŭ.
Zaraz advakat Mikity rychtuje čarhovuju zajavu va ŭsie orhany Biełarusi i Litvy, kab usio ž taki raspačali kryminalnuju spravu i pryciahnuli byłoha ŭłaśnika da adkaznaści. U tym liku Mikita raźličvaje na pakryćcio maralnaj i materyjalnaj škody.
