Biełaruś bačyć vialiki patencyjał supracoŭnictva ź Jeŭrasajuzam. Heta adznačyŭ namieśnik ministra zamiežnych spraŭ Biełarusi Aleh Kraŭčanka siońnia na adkryćci XVII Minskaha forumu «Miesca Biełarusi ŭ Jeŭropie. Šancy dla zamiežnaj palityki, ekanomiki, hramadzianskaj supolnaści i kultury», jaki 4-6 śniežnia prachodzić u biełaruskaj stalicy, pieradaje BiełTA.
«Naša zamiežnaja palityka, naša dypłamatyja, jak viadoma, šmatviektarnaja, ale zusim nie raznaviektarnaja. My nie sprabujem hulać na supiarečnaściach, ale imkniemsia ich zhładžvać. I ŭ hetym - značny patencyjał dla supracoŭnictva pamiž našaj krainaj i Jeŭrasajuzam, jakoje zdolna abiarnucca dyvidendami dla kožnaha z nas», — adznačyŭ namieśnik kiraŭnika biełaruskaha MZS.
«Kali praanalizavać, što adbyłosia za apošnija hady, vidavočny rost intensiŭnaści kantaktaŭ va ŭsich śfierach. Tak, vizity jeŭrakamisaraŭ i ministraŭ zamiežnych spraŭ krain — členaŭ ES u Biełaruś pierajšli z razradu siensacyj ŭ katehoryju narmalnaj, paŭsiadzionnaj pracy, — skazaŭ Aleh Kraŭčanka. — Padčas pieramovaŭ my ŭsio bolš kancentrujemsia na praktyčnych pytańniach uzajemnaj cikavaści».
