Moj vizit 13 sakavika — heta jasny sihnał ab tym, što Jeŭrapiejski Sajuz u pryncypie hatovy adnavić svaje adnosiny ź Biełaruśsiu i jaje narodam. Piša Jeŭrapiejski Kamisar pa zamiežnych suviaziach i palitycy dobrasusiedstva Bienita Fierera‑Valdner.
Jeŭrapiejska‑biełaruskija adnosiny znachodziacca na rostaniach, i my žadajem skarystać hetuju mahčymaść dla taho, kab pabudavać uzajemavyhadnyja adnosiny. Ja maju namier abmierkavać z uładami i hramadzianskaj supolnaściu, što ES i Jeŭrapiejskaja Kamisija mohuć prapanavać Biełarusi, a taksama, što moža zrabić Biełaruś, kab raźvić hety patencyjał u bližejšaj budučyni.
Siońniašniaja bolš pazityŭnaja dynamika stała mahčymaj, dziakujučy vyzvaleńniu troch palityčnych źniavolenych minułym letam. Takoje raźvićcio padziej dazvoliła ES prypynić dziejańnie vizavych abmiežavańniaŭ dla niekatorych asobaŭ i ŭstupić u dyjałoh ź Biełaruśsiu paśla niekalkich hadoŭ abmiežavanych kantaktaŭ.
Ja miarkuju, što ES maje bahata čaho prapanavać Biełarusi i jaje narodu, kali Biełaruś prademanstruje svaje surjoznyja namiery pa adnaŭleńniu adnosinaŭ z nami.
Zaraz ES raspracoŭvaje prahramu «Uschodniaha partniorstva» sa svaimi ŭschodnimi susiedziami. Biełaruś moža stać udzielnicaj hetaha partniorstva, jakoje abjadnaje 27 krainaŭ‑čalcoŭ ES z Ukrainaj, Małdovaj i krainami Paŭdniovaha Kaŭkazu. Heta šaniec pakinuć u minułym hady izalacyi, jakija doŭžylisia zašmat, i ŭstupić u palityčny i ekanamičny abmien z reštaj jeŭrapiejskaj siamji.
A kankretna, ES patencyjna moh by prapanavać supracoŭnictva ź Biełaruśsiu, jakoje prostyja hramadzianie adčuli b na sabie. My mahli b pracavać razam z vami, kab dapamahčy biełaruskaj ekanomicy dapasavacca da novych ekanamičnych vyklikaŭ u rehijonie. My mahli b dapamahčy vam skasavać barjery ŭ handli z našymi krainami‑čalcami praz padtrymku mieraŭ, skiravanych na pryviadzieńnie vašych tavaraŭ u adpaviednaść sa standartami ES. ES chacieŭ by intensifikavać našy kantakty ŭ halinie enerhietyčnaj biaśpieki. I, kali ŭsio budzie dobra, moža taksama źjavicca bolej mahčymaściaŭ dla biełaruskich studentaŭ navučacca ŭ ES, i praściejšyja vizavyja pracedury dla inšych hramadzianaŭ, jakija jeździać u ES.
Zrazumieła, usio heta budzie zaležyć ad taho vybaru, jaki zrobić Biełaruś. Bolej krokaŭ u napramku asnoŭnych svabodaŭ i demakratyčnych reformaŭ dazvolić nam z vami mieć bolš ciesnyja stasunki. Biełaruś pavinnaja prymać svaje ŭłasnyja suvierennyja rašeńni ab svaim ułasnym losie.
Za apošnija try miesiacy my bačyli niekalki sihnałaŭ, jakija nas zaachvocili. Akramia vyzvaleńnia palityčnych źniavolenych, my pryvitali admienu abmiežavańniaŭ dla dvuch asnoŭnych niezaležnych hazietaŭ, jakija za hety čas iznoŭ pačali drukavacca i raspaŭsiudžvacca; my byli radyja ŭbačyć rehistracyju arhanizacyi «Za Svabodu» Alaksandra Milinkieviča, a taksama praviadzieńnie kansultacyj pa vybarčaj reformie pamiž Biełaruśsiu i Biuro pa demakratyčnych instytutach i pravach čałavieka ABSIE 22 studzienia.
I my pilna sačyli za adkryćciom niekatorych novych mahčymaściaŭ dla dyjałohu pamiž uradam i hramadzianskaj supolnaściu. Upieršyniu hramadzianskaja supolnaść i apazicyja byli zaprošanyja dla abmierkavańnia na vysokim uzroŭni, z udziełam pradstaŭnikoŭ Administracyi prezidenta, pytańniaŭ ŚMI, u tym liku, karystańnia resursami Internet, i budučyni Biełarusi ŭvohule. Heta znak taho, što čas mianiajecca i, mahčyma, mianiajucca i adnosiny.
Usio heta zaachvočvaje, ale zrabić treba jašče vielmi šmat.
Kali my źbirajemsia pačać novuju hłavu ŭ našych adnosinach i kali my źbirajemsia paćvierdzić rašeńnie ab prypynieńni vizavych abmiežavańniaŭ, my pavinny ŭbačyć bolšy prahres na hetym pazityŭnym šlachu i jasnyja sihnały ab tym, što ŭrad maje namier praciahnuć ruch pa šlachu demakratyčnych reformaŭ.
ES ličyć, što kožny pavinny mieć prava vybirać svaich lideraŭ demakratyčnym čynam, i my budziem praciahvać zaklikać biełaruskija ŭłady supracoŭničać z BDIPČ ABSIE pa pytańniach reformaŭ vybarčaha zakanadaŭstva. My ličym, što dostup da niezaležnaj infarmacyi i svaboda vykazvańnia źjaŭlajucca asnoŭnymi pravami, jakija pavinny pavažacca. Heta značyć, što žurnalistam pavinna być dazvolena pracavać volna — biez zapałochvańniaŭ i pieraśledu, biez strachu zakryćcia hazietaŭ abo pieraškodaŭ dla ich raspaŭsiudu. My rehularna ŭzdymajem pytańnie ab nieabchodnaści palapšeńnia situacyi ź niedziaržaŭnymi arhanizacyjami, jakija dla nas jość žyćciova važnaj častkaj hramadstva. My budziem praciahvać zaklikać da prahresu ŭ halinie svabody schodaŭ u Biełarusi, tamu što my ličym ich narmalnaj častkaj pracesu publičnaha abmierkavańnia.
Pabudova adnosinaŭ ź lubym partnioram pavinna być vulicaj z dvuchbakovym rucham, i, jak ja ŭžo zaznačyła, my bahata možam prapanavać Biełarusi. Kali Biełaruś zrobić vybar na karyść reformaŭ i bolšaj adkrytaści, ES hatovy dać pazityŭny adkaz i dapamahčy Biełarusi, dzie tolki mahčyma. My pačali pracavać nad prapanovami i my hatovyja prapanavać Biełarusi ŭsie pieravahi našaj Jeŭrapiejskaj palityki dobrasusiedstva. Ja chacieła b bačyć, jak Biełaruś pracuje razam ź ES na karyść bolšaha dabrabytu i bolšaj pavahi da indyvidualnych pravoŭ u partniorstvie roŭnych. Vybar zaraz za vami.
