Na fonie biełaha kvadratu z čyrvonym jajkam Aleś Razanaŭ čytaŭ svaje vieršy j pierakłady. U mienskaj kaviarni «Dobryja myśli» 3 studzienia prajšła prezentacyja «Knihi ŭznaŭleńniaŭ» i zbornika «Lasnaja daroha».
Da prezentacyi padrychtavali vystavu «Jajkakvadrataŭ» — heta artefakty, stvoranyja A.Razanavym i mastakom Viktaram Markaŭcom. «Jajkakvadratami» paznačanyja i novyja knihi Razanava. Na kožnaj knizie — novy tvor. «Kniha ŭznaŭleńniaŭ» maje na vokładcy biełaje jajka ŭ čornym kvadracie. Druhaja — čyrvonaje jajka ŭ biełym kvadracie. Nastupnymi jajkakvadratami buduć paznačanyja dalejšyja knihi seryi.
Razanaŭ kaža, što heta buduć «i paemy, i punkciry, i jašče niešta». Uvojduć tvory, napisanyja ŭ Biełarusi i Niamieččynie. «Možna było b ukłaści ŭsio ŭ adnu knihu, ale jany sami zachacieli ŭkłaścisia płastami. Dumaju, heta pravilny chod», — kaža paet.
U pieršy zbornik uvajšli pierakłady tvoraŭ Kiryły Turaŭskaha, Franciška Skaryny, Symona Budnaha, Vasila Ciapinskaha, Jazepa Ruckaha, Mialeta Smatryckaha, Lava Sapiehi dy inš. Bolšaść drukavałasia ŭ «Krynicy». Paet zaznačyŭ, što ŭsie aŭtary składajuć naš knižny epas, tamu knihu nia varta ličyć skončanaj. I z hetaha hledzišča knihu lepš čytać u advarotnym chranalahičnym paradku, akunajučysia ŭsio hłybiej u biełaruski Kosmas.
Razanaŭ raspavioŭ, što pierakładami Skarynavych tekstaŭ zaniaŭsia pry kancy 1980-ch: «Ja pakłaŭ pierakłady ŭ šufladu, a jany nie stareli, a tolki maładzieli. I ŭ naš pakručasty čas stanavilisia ŭsio bolš sučasnymi». Na tvory Kiryły Trankvilijona jahonuju ŭvahu źviarnuŭ litaraturaznaŭca Ivan Savierčanka. «Ja nidzie bolej nie sustrakaŭ takich praniknionych słovaŭ pra ziamnoje i viečnaje», — pryznaŭsia Razanaŭ, čytajučy hetaha baročnaha aŭtara.
Doktarka bahasłoŭja Iryna Dubianieckaja skazała: «Funkcyju bahasłoŭskaj i filazofskaj škołaŭ u Biełarusi ŭziała na siabie paezija, asabliva ŭ XX stahodździ».
