Pit Butydžydž: Pryznacca ŭ tym, što ja hiej, ja vyrašyŭ, kali byŭ na vajnie

Upieršyniu ŭ lik lidaraŭ honki za prava stać kandydatam u prezidenty ZŠA ŭvajšoŭ adkryty hiej.

Heta 37-hadovy Pit Butydžydž (Pete Buttigieg), samy małady z pretendentaŭ i mer 100-tysiačnaha horada ŭ hłybincy, štacie Indyjana.

«Pamiž momantam, kali ja zrazumieŭ, što ja hiej, i momantam, kali ja publična ŭ hetym pryznaŭsia, byŭ pieryjad, kali ja śviadoma paźbiahaŭ kachańnia, — raskazaŭ Butydžydž u intervju «Ńju-Jork tajms»,

— heta mnie čahości kaštavała, heta trochi cisnuła. Z druhoha boku, ja byŭ taksama vielmi zaniaty adkaznaj pracaj [jon byŭ studentam-miehavydatnikam, paśla pracavaŭ u biznesie i vałancioryŭ u Demakratyčnaj partyi, a paśla staŭ meram]. Ja nie ŭpeŭnieny, što ja tak mała b źviartaŭ na heta ŭvahu, kali b ja pracavaŭ 40 hadzin za tydzień abo kali ja b rabiŭ niešta, što dla mianie nie było takim važnym», — miarkuje jon. 

Na kaminh-aŭt Butydžydža padšturchnuŭ dośvied słužby ŭ armii ŭ Afhanistanie, pieraasensavańnie važnych dla siabie momantaŭ, kali idzieš na bajavoje zadańnie. «Tam ty rychtuješ siabie da ryzyki śmierci va ŭzroście, kali bolšaść tvaich adnahodkaŭ majuć štości, čaho ty nie maješ, — jany viedajuć, što takoje być zakachanym. A dla mianie heta było niedasiažnym».

Tam, u Afhanistanie, Butydžydž pryniaŭ dla siabie rašeńnie, što jon pavinien heta zrabić. U toj čas raniejšy pryncyp «don't ask, don't tell», «nie pytacca i samomu nie raskazvać», adnosna hiejaŭ u armii byŭ admienieny, i pryznańnie ŭ svajoj aryjentacyi nie aznačała nieabchodnaść sychodu z armii (paśla Afhanistana Butydžydž praciahvaŭ słužby ŭ reziervie).

Ale Butydžydž byŭ jašče i meram horada — kab adsłužyć u Afhanistanie, jon uziaŭ siamimiesiačny adpačynak na pasadzie mera. U Afhanistanie dasłužyŭsia da lejtenanta raźviedki.

Pierad pieraabrańniem na pasadu mera horada Saŭsbend ŭ 2015-m Butydžydž zrabiŭ kaminh-aŭt, a ŭ 2018-m jon pabraŭsia šlubam z mužčynam.

Butydžydž dapuskaŭ, što ŭ kansiervatyŭnaj Indyjanie hieja nie pieraabiaruć, ale ryzyknuŭ palityčnaj karjeraj dziela taho, što ličyŭ važnym. Jon pamyliŭsia. Žychary horada z nasielnictvam 102 tysiačy čałaviek, heta prykładna jak Maładziečna, pieraabrali Butydžydža z redkim dla ZŠA vynikam 80 % hałasoŭ.

Pavialičyć

Marafon vybaru kandydata ŭ prezidenty ad Demakratyčnaj partyi startuje ŭ ZŠA na pačatku lutaha.

Asnoŭnaja baraćba razharnułasia miž vieteranami. Centrystu, byłomu vice-prezidenty 77-hadovamu Džo Bajdenu procistaić pradstaŭnik levaha kryła partyi, 78-hadovy Berni Sanders. Šancy na ryvok u apošni momant maje jašče adzin 77-hadovy kandydat, miljarder Majkł Błumbierh, jaki tracić na kampaniju vializnyja resursy. Jašče adnoj ź lidarak — Elizabet Uoren — 70 hadoŭ.

Taki ŭzrost kandydataŭ-demakrataŭ śviedčyć nie tolki pra značnyja dasiahnieńni amierykanskaj miedycyny, usio ž pieradvybary ŭ ZŠA patrabujuć ad kandydata kałasalnych zatrat enierhii. Ale taksama prajava niaviery ŭ pieramohu nad Trampam — niekatoryja maładziejšyja zorki Demakratyčnaj partyi ličać za lepšaje pačakać. I, taksama, u peŭnaj stupieni — kryzisu idej, kali «ŭ boj iduć adny staryki».

Pavialičyć

Ajova, jakaja na pieradvybarach hałasuje pieršaj, — heta sielskahaspadarčy štat. Jak praviła, kandydaty, jaki pieramahajuć u Ajovie i Ńju-Hiempšyry, što hałasuje druhim, pieramahajuć i va ŭsioj krainie.

Pieradvybary ŭ Ajovie, tak zvanyja «kokusy», adbyvajucca 3 lutaha.

U ahulnaamierykanskich apytańniach Butydžydž siarod demakrataŭ pakul 4-y, jon robić staŭku na dobry vynik u Ajovie i spadziajecca, što heta daść turbastart jaho kampanii.

Styl Butydžydža aściarožny, strymany, moža być, praźmierna «pravilny», u adroźnieńnie ad vybuchovych Trampa i Sandersa i Bajdena, jaki ŭmieje pažartavać. Moža być, Butydžydž i niedastatkova jaskravy, kab stać palitykam numar adzin nacyjanalnaha maštabu. Naprykład, jon nie vyklikaje zachapleńnia ŭ samaha maładoha pakaleńnia. U Cik-toku da jaho prylapiłasia mianuška Mayo Pete, pa hulni słoŭ z Mayor Pete, ad słova Mayo, majanezik, — heta značyć niechta nievyrazny, biezabličny.

U kožnym razie, sam fakt dobrych rejtynhaŭ Butydžydža na hetym etapie kampanii aznačaje, što ŭ amierykanskaj palitycy hiej užo moža spaborničać na roŭnych. Značeńnie majuć zdolnaści palityka i administratara, a nie seksualnaja aryjentacyja. I heta vielmi natchnialna dla miljonaŭ ludziej va ŭsich śviecie, jakija chočuć mieć roŭnyja šancy. 

Na siońnia ŭ ZŠA raŭnapraŭje hiejaŭ usprymajecca jak norma absalutnaj bolšaściu nasielnictva. Bolš za toje, na siońnia prykładna 61% amierykancaŭ padtrymlivaje prava ŁHBT na adnapołyja šluby, suprać vykazvajucca tolki 31 %, zhodna z apytańniem Pew Research.

Sam Butydžydž aceńvaje svaje šancy realistyčna: «Zvyčajna pieršym pieraadolvaje barjer na šlachu da prezidenctva nie toj, chto pieršym pasprabavaŭ heta zrabić». Abama byŭ nie pieršym afraamierykancam, jaki sprabavaŭ stać kandydatam u prezidenty. 

• 0
• 0
• 0
• 0
• 0